മുളങ്കുന്നത്തകാവ്: കോണ്‍ഗ്രസ് പ്രവര്‍ത്തകര്‍ നടത്തിയ പ്രകടനത്തിനുനേരെ സ്ത്രീകള്‍ അടക്കമുള്ള സിപിഎം പ്രവര്‍ത്തകരുടെ ആക്രമണം. നഗരസഭ പ്രതിപക്ഷ നേതാവടക്കം നാലു പേര്‍ക്കു പരിക്കേറ്റു. വടക്കാഞ്ചേരി പീഡനക്കേസില്‍ ആരോപണവിധേയനായ ജയന്തന്റെ ഡിവിഷനില്‍ നടത്തുന്ന പൊതുയോഗത്തിന്റെ ഭാഗമായി നടത്തിയപ്രകടനത്തിനുനേരെയാണ് ആക്രമണമു ണ്ടായത്.
പരിക്കേറ്റ കെ. അജിത്ത്കുമാര്‍. മണ്ഡലം ജോയിന്റ് സെക്രട്ടറി എന്‍.ആര്‍. രാധകൃഷണന്‍, പി.ജി. ജയദീപ്, ടി.കെ. ഹരിദാസ് എന്നിവരെ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. ഇന്നലെ വൈകീട്ടാണ് സംഭവം. ജാഥ തുടങ്ങുമ്പോള്‍ ഒപ്പമുണ്ടായിരുന്ന പോലീസ് സംഭവത്തിനു മുമ്പ് ബോധപൂര്‍വം സ്ഥലംവിട്ടതായി കോണ്‍ഗ്രസ് പ്രവര്‍ത്തകര്‍ ആരോപിച്ചു. ചൂലും ചാണകവെള്ളവുമായായിരുന്നു ആക്രമണം.
നിയുക്ത ഡിസിസി പ്രസിഡന്റ് ടി.എന്‍. പ്രതാപന്‍, മുന്‍ എംഎല്‍എ പി.എ. മാധവന്‍ എന്നിവര്‍ പരിക്കേറ്റവരെ ആശുപത്രിയില്‍ സന്ദര്‍ശിച്ചു. ഇന്നു വൈകിട്ട് അഞ്ചിന് അത്താണി സെന്ററില്‍ നടത്തുന്ന പ്രതിഷേധ യോഗം വി.ഡി. സതിശന്‍ ഉദ്ഘാടനം ചെയ്യും.
