പയ്യന്നൂര്‍: കൊടിമരം സ്ഥാപിച്ചതിനെചൊല്ലിയുള്ള വാക്കേറ്റത്തെ തുടര്‍ന്ന് പയ്യന്നൂരിനടുത്ത് കവ്വായിയില്‍ ബോംബേറും അക്രമവും. എട്ടു വീടുകളും 12 വാഹനങ്ങളും ലീഗ് ഓഫീസുകളും അടിച്ചുതകര്‍ത്തു. അക്രമത്തില്‍ പരിക്കേറ്റ യൂത്ത് ലീഗ് പയ്യന്നൂർ മണ്ഡലം സെക്രട്ടറി ഫായിസ് കവ്വായി,നഫീസുദ്ദീന്‍, വിവാഹത്തില്‍ പങ്കെടുക്കാനെത്തിയ യുവാവ് എന്നിവരെ മംഗലാപുരത്തെ സ്വകാര്യ ആശുപത്രിയിലും ഡിവൈഎഫ്ഐ പയ്യന്നൂര്‍ ബ്ലോക്ക് കമ്മിറ്റിയംഗം പെരളം കൊഴുമ്മലിലെ ജി.ലിജിത്തിനെ പയ്യന്നൂര്‍ സഹകരണ ആശുപത്രിയിലും പ്രവേശിപ്പിച്ചു.
രണ്ടുദിവസം മുമ്പ് കവ്വായി വാടിപ്പുറത്ത് ലീഗ് കൊടിമരത്തിന് സമീപം സിപിഎം കൊടിമരം സ്ഥാപിച്ചിരുന്നു. ഇതേച്ചൊല്ലി വാക്കേറ്റമുണ്ടായപ്പോൾ രണ്ടുകൊടിമരങ്ങളും നീക്കം ചെയ്യാന്‍ ഇരുകൂട്ടരോടും പോലീസ് ആവശ്യപ്പെട്ടിരുന്നു. നിര്‍ദേശം നടപ്പാക്കാത്തതിനെ തുടര്‍ന്ന് ഇന്നലെ വൈകുന്നേരം പയ്യന്നൂര്‍ എസ്‌ഐ കെ.പി.ഷൈനിന്‍റെ നേതൃത്വത്തിലുള്ള പോലീസ് സംഘം കൊടിമരങ്ങള്‍ നീക്കം ചെയ്തു.
ഇതേച്ചൊല്ലി വീണ്ടും വാക്കേറ്റം തുടങ്ങിയപ്പോള്‍ മുസ്ലിം ലീഗ് – സിപിഎം നേതൃത്വവുമായി പോലീസ് സംസാരിച്ച് രമ്യതയിലെത്തിയതാണ്. എന്നാല്‍, കവ്വായി പാലത്തിന് സമീപം ഒത്തുകൂടിയ ഇരുപാര്‍ട്ടികളുടെയും പ്രവര്‍ത്തകര്‍ തമ്മിലുണ്ടായ വാക്കേറ്റത്തിനിടെ ഡിവൈഎഫ്ഐ നേതാവ് ലിജിത്തിന് മര്‍ദനമേറ്റതാണ് പ്രശ്‌നങ്ങള്‍ നിയന്ത്രണാതീതമാക്കിയത്. വിവരമറിഞ്ഞ് പാലത്തിന് ഇരുവശങ്ങളിലുമായി ഇരുപാര്‍ട്ടിക്കാരും സംഘടിച്ച് പോര്‍വിളി മുഴക്കുകയും ഉപരോധം സൃഷ്ടിക്കുകയുമായിരുന്നു.
ഇതിനിടയിലാണ രാത്രി പത്തോടെ രണ്ടുതവണ ബോംബേറുണ്ടായത്.സ്‌ഫോടനത്തോടെ ലീഗ് പ്രവര്‍ത്തകര്‍ ചിതറി ഓടിയശേഷമാണ് വീടുകള്‍ക്കും വാഹനങ്ങള്‍ക്കും നേരെ അക്രമമുണ്ടായത്. കവ്വായിയിലെ എ.പി.രുഖ്‌നുദ്ദീന്‍, സി.എം.വി.റഷീദ്, എ.പി.അബ്ദുള്‍സലാം പടിഞ്ഞാറെപുരയില്‍ അവ്വുമ്മ, വാടിപ്പുറത്തെ അഫ്‌സല്‍ കാട്ടുര്‍ എന്നിവരുടെ വീടുകള്‍ക്ക് നേരെയാണ് അക്രമമുണ്ടായത്.
ഈ വീടുകളും അവ്വുമ്മയുടെ വീട്ടുമുറ്റത്ത് നിര്‍ത്തിയിട്ടിരുന്ന കെ.അബ്ദുള്‍ ഗഫൂറിന്‍റെ ഇന്നോവ കാര്‍, കവ്വായി യൂത്ത് സെന്‍ററിന്‍റെ ജീപ്പ്, സമീപത്തുണ്ടായിരുന്ന സ്‌കൂട്ടര്‍ ബൈക്ക് എന്നിവയും അടിച്ചു തകര്‍ത്തു. ഇതിനിടയില്‍ ഫായിസ് കവ്വായിയുടെ കൈകാലുകള്‍ അടിച്ചു തകര്‍ത്തു.ബോംബേറിലാണ് ഫായിസിന് പരിക്കേറ്റതെന്ന് ലീഗ് നേതൃത്വം ആരോപിക്കുന്നു.
ഗുരുതരമായി പരിക്കേറ്റ ഫായിസ് മംഗലാപുരം സ്വകാര്യ ആശുപത്രിയില്‍ ചികിത്സയിലാണ്.ഇതിന് ശേഷമാണ് മുസ്ലിം ലീഗിന്‍റെ പെരുമ്പ ബൈപാസ് ജംഗ്ഷനിലെ ഓഫീസിന് നേരേയും തായിനേരി ലീഗ് ഓഫീസിന് നേരേയും അക്രമമുണ്ടായത്.
പെരുമ്പയിലെ ലീഗ് ഓഫീസിലെ കസേരകളും അലമാരകളും ടിവിയും ഉള്‍പ്പെടെയുള്ള ഉപകരണങ്ങളും ജനലുകളും പൂര്‍ണമായും അടിച്ചു തകര്‍ത്തു. ജില്ലാ പോലീസ് മേധാവി ജി. ശിവവിക്രം, തളിപ്പറമ്പ് ഡിവൈഎസ്പി കെ.വി.വേണുഗോപാല്‍ എന്നിവര്‍ സംഭവ സ്ഥലം സന്ദര്‍ശിച്ചു. പ്രദേശത്ത് കനത്തസുരക്ഷ ഏർപ്പെടുത്തിയിട്ടുണ്ട്.
തു
