ഉദയംപേരൂർ: ബാർ ജീവനക്കാരുടെ ആക്രമണത്തിൽ യുവാക്കൾക്ക് ഗുരുതരമായി പരിക്കേറ്റു. തൃപ്പൂണിത്തുറ വാലുമ്മേൽ ഉഷസ് വീട്ടിൽ മുകേഷ് (21), മേക്കര വാലുമ്മേൽ സൂര്യരാജ് (22) എന്നിവരാണ് ആശുപത്രിയിൽ ചികിത്സയിലുള്ളത്.
തലയിൽ രക്തസ്രാവമുണ്ടായ മുകേഷിനെ തൃപ്പൂണിത്തുറ താലൂക്കാശുപത്രിയിൽനിന്ന് എറണാകുളത്തെ സ്വകാര്യ ആശുപത്രിയിലേക്ക് ശസ്ത്രക്രിയയ്ക്കായി മാറ്റി.
യുവാക്കളുടെ പുറത്ത് കമ്പിവടിക്ക് അടിയേറ്റ പാടുകളുണ്ട്.ഉദയംപേരൂരിലെ ഏകചക്ര ബാറിലെ ജീവനക്കാരാണ് ആക്രമിച്ചതെന്ന് യുവാക്കൾ പറഞ്ഞു.
ബാറിൽ പ്രായമായ വ്യക്തിയെ ജീവനക്കാർ ഉപദ്രവിക്കുന്നത് കണ്ട് ചോദ്യംചെയ്തപ്പോഴായിരുന്നു മർദനമെന്നും പറയുന്നു.
ഞായറാഴ്ച വൈകിട്ടായിരുന്നു സംഭവം. സംഭവത്തിൽ നാലു ബാർ ജീവനക്കാരെ ഉദയംപേരൂർ പോലീസ് കസ്റ്റഡിയിലെടുത്തതായി സൂചനയുണ്ട്.
