പന്തളം: അജ്ഞാത സംഘത്തിന്‍റെ ആക്രമണത്തിനിരയായ എസ്എഫ്ഐ നേതാവിന്‍റെ നില ഗുരുതരം. എസ്എഫ്ഐ പത്തനംതിട്ട ജില്ലാ വൈസ് പ്രസിഡന്‍റ് വിഷ്ണു.കെ.രമേശിനാണ്(24) വെട്ടേറ്റത്. പന്തളത്തിന് സമീപം മങ്ങാരത്തുവെച്ചാണ് വിഷ്ണുവിന് നേരേ ആക്രമണമുണ്ടായത്.ഇന്നലെ രാത്രി പത്തോടെയായിരുന്നു സംഭവം.
പന്തളത്തുനിന്ന് ചേരിക്കലിലെ വീട്ടിലേക്ക് പോകുന്ന വഴിയിൽ മങ്ങാരം കരണ്ടയിൽ ക്ഷേത്രത്തിന് സമീപം വെച്ച് ബൈക്കിലെത്തിയ മൂന്നംഗ സംഘം മാരകായുധങ്ങളുമായി ആക്രമിക്കുകയായിരുന്നു. തലയ്ക്കും കഴുത്തിനും കൈയ്ക്കും കാലുകൾക്കും മാരകമായി പരിക്കേറ്റിരുന്നു.
എന്നാൽ, അപകടനില തരണം ചെയ്തിട്ടുണ്ട്. വിഷ്ണു കോട്ടയം മെഡിക്കൽ കോളേജിലാണ് ചികിത്സയിലുള്ളത്. സംഭവത്തിൽ എസ്എഫ്ഐ ജില്ലാ കമ്മറ്റിയും പന്തളം ഏരിയാ കമ്മിറ്റിയും ശക്തമായ പ്രതിഷേധിച്ചു. പ്രതികളെ കണ്ടെത്താൻ ഉൗർജിതമായ അന്വേഷണം തുടങ്ങിയതായി അടൂർ ഡിവൈഎസ്പി ആർ.ജോസ് അറിയിച്ചു.
