കോഴിക്കോട്: മദ്യപാനികളുടെ നെഞ്ചുതകര്‍ക്കുന്നതാണ് എക്‌സൈസ് പുറത്തുവിട്ടിരിക്കുന്ന കണക്കുകള്‍. കഴിഞ്ഞ നാലു വര്‍ഷത്തിനുള്ളില്‍ സംസ്ഥാനത്ത് എക്‌സൈസ് അധികൃതര്‍ പിടികൂടി നശിപ്പിച്ചു കളഞ്ഞത് അഞ്ച് ലക്ഷത്തോളം ലിറ്റര്‍ മദ്യമാണ്. സ്പിരിറ്റ്, ചാരായം, ഇന്ത്യന്‍ നിർമിത വിദേശമദ്യം, അരിഷ്ടം, ബിയര്‍, കള്ള്, അന്യസംസ്ഥാന മദ്യം, വൈന്‍ എന്നീ ഇനങ്ങളിലാണ് ഇത്രയേറെ അളവില്‍ ലഹരി പിടികൂടിയത്.
2021 മുതല്‍ 2024 ഡിസംബര്‍ 31 വരെയുള്ള കാലയളവിലെ കണക്കാണിത്. പിടികൂടുന്ന മദ്യം നടപടി ക്രമങ്ങള്‍ പൂര്‍ത്തിയാക്കി നശിപ്പിച്ചു കളയുകയും സ്പിരിറ്റ് സര്‍ക്കാരിലേക്ക് മുതല്‍ക്കൂട്ടുകയുമാണ് ചെയ്യുന്നത്. 78,534.05 ലിറ്റര്‍ സ്പിരിറ്റ്, 22,932.865 ലിറ്റര്‍ ചാരായം,1,89,667.55 ലിറ്റര്‍ ഇന്ത്യന്‍ നിർമിത വിദേശമദ്യം, 12,12297.60 ലിറ്റര്‍ വാഷ്, 10,796.675 ലിറ്റര്‍ അരിഷ്ടം, 9,2111.33 ലിറ്റര്‍ ബിയര്‍, 64,165.99 ലിറ്റര്‍ കള്ള്, 58,940.76 ലിറ്റര്‍ അന്യസംസ്ഥാന മദ്യം, 11,215.95 ലിറ്റര്‍ അനധികൃത മദ്യം, 15,505.625 ലിറ്റര്‍ വൈന്‍ എന്നിവയാണ് നാലുവര്‍ഷ കാലയളവില്‍ എക്‌സൈസ് പിടികൂടിയത്.
ഇക്കാലയളവില്‍ എക്‌സൈസ് വകുപ്പ് 69,236 അബ്കാരി കേസുകളും 24,760 എന്‍ഡിപിഎസ് കേസുകളും 2,89,219 കോട്പ കേസുകളും രജിസ്റ്റര്‍ ചെയ്തു. അബ്കാരി കേസുകളില്‍ 56,204 പേരെയും എന്‍ഡിപിഎസ് കേസില്‍ 24,124 പേരെയും അറസ്റ്റു ചെയ്തു. പിടിച്ചെടുക്കുന്ന വിവിധയിനം മദ്യങ്ങള്‍ അബ്കാരി ആക്ടിലെ 67 വകുപ്പുപ്രകാരം ബന്ധപ്പെട്ട ഉദ്യോഗസ്ഥനു മുമ്പാകെ ഹാജരാക്കും. ഇവയുടെ ഫോട്ടോ ചിത്രീകരിക്കുകയും മറ്റു നടപടികള്‍ പൂര്‍ത്തിയാക്കുകയും ചെയ്തശേഷം ബന്ധപ്പെട്ട മജിസ്‌ട്രേറ്റിനെക്കൊണ്ട് സാക്ഷ്യപ്പെടുത്തി കോടതിയില് സമര്‍പ്പിക്കും.
തുടര്‍ന്ന് മദ്യം സര്‍ക്കാരിലേക്ക് കണ്ടുകെട്ടിയശേഷമാണ് സ്പിരിറ്റ് ഒഴികെയുള്ള ലഹരികള്‍ എക്‌സൈസ് കമ്മീഷണര്‍ അധ്യക്ഷനായ ഡിസ്‌പോസല്‍ കമ്മിറ്റിയുടെ അനുമതിയോടെ നശിപ്പിച്ചു കളയുന്നത്. കഞ്ചാവും മറ്റുമയക്കുമരുന്നുകളും ഇതേ നടപടിക്രമങ്ങള്‍ പൂര്‍ത്തിയാക്കി നശിപ്പിച്ചു കളയുകയാണ് പതിവ്.
