നടി ആക്രമിക്കപ്പെട്ട കേസുമായി ബന്ധപ്പെട്ട് ദിലീപിന്റെ പുട്ടുകട തല്ലിപ്പൊളിച്ച ഡിവൈഎഫ്ഐ എന്തുകൊണ്ടാണ് എടപ്പാളിലെ തിയറ്ററില്‍ പെണ്‍കുട്ടിയെ ആക്രമിച്ച മൊയ്തീന്‍ കുട്ടിയുടെ സ്വര്‍ണക്കട തല്ലിപ്പൊളിക്കാത്തത് എന്ന ചോദ്യവുമായി ദിലീപിന്റെ ബന്ധുവും നടനുമായ അല്ലു അപ്പു രംഗത്ത്. ഒരു മുത്തശ്ശിഗ്ഗദ എന്ന ചിത്രത്തില്‍ ബംഗാളി ബാബുവായി ശ്രദ്ധേയനായ അപ്പു ദിലീപിന്റെ സഹോദരന്‍ അനൂപിന്റെ ബന്ധുകൂടിയാണ്.
എടപ്പാളിലെ തിയറ്ററില്‍ പത്തു വയസ്സുകാരി പെണ്‍കുട്ടിയെ പീഡിപ്പിച്ച കേസില്‍ പോലീസ് പിടിയിലായ മൊയ്തീന്‍കുട്ടി സ്വര്‍ണ്ണവ്യാപാരിയാണ്. സ്വര്‍ണക്കുട്ടി എന്നാണ് ഇയാള്‍ നാട്ടില്‍ അറിയപ്പെടുന്നതു തന്നെ. ഇയാള്‍ക്ക് മലപ്പുറത്ത് കടയുണ്ടെന്നാണ് പ്രചരിക്കുന്ന വിവരം. ഇതിന്റെ അടിസ്ഥാനത്തിലാണ് അപ്പുവിന്റെ ചോദ്യം. ഫേസ്ബുക്ക് പോസ്റ്റിലൂടെയാണ് അപ്പു തന്റെ സംശയം ഉന്നയിച്ചിരിക്കുന്നത്.
നടി ആക്രമിക്കപ്പെട്ട കേസ് കൊടുംപിരി കൊണ്ടുനിന്ന കാലത്ത് കോഴിക്കോട്ടുള്ള ദിലീപിന്റെ ദേ പുട്ട് റെസ്റ്റോറന്റിന് നേര്‍ക്ക് ഡിവൈഎഫ്ഐ പ്രവര്‍ത്തകരുടെ ആക്രമണമുണ്ടായിരുന്നു. ഇതുമായി ബന്ധപ്പെടുത്തിയാണ് മൊയതീന്‍കുട്ടിയുടെ കടയ്ക്കുനേരെ ആക്രമണം നടത്താത്തതെന്താണെന്ന് അപ്പു ചോദിച്ചിരിക്കുന്നത്.
