ഹൈദരാബാദ്: പുഷ്പ രണ്ട് സിനിമയുടെ റിലീസിനിടെ തിക്കിലും തിരക്കിലും പെട്ട് യുവതി മരിച്ച സംഭവത്തിൽ അറസ്റ്റിലായ നടന്‍ അല്ലു അര്‍ജുൻ ജയിൽ മോചിതനായി. കേസിൽ തെലങ്കാന ഹൈക്കോടതി താരത്തിന് ഇടക്കാല ജാമ്യം അനുവദിച്ചിരുന്നു.
എന്നാൽ ഇടക്കാല ജാമ്യ ഉത്തരവിന്‍റെ ഒപ്പിട്ട പകർപ്പ് ജയിലിൽ എത്താത്തതിനെ തുടർന്ന് ഇന്നലെ അല്ലു അർജുന് ജയിലിൽ കഴിയേണ്ടിവന്നിരുന്നു. ജയിലിൽ നിന്ന് പുറത്തിറങ്ങിയ താരത്തെ സ്വീകരിക്കാൻ വൻ ആരാധകപട തന്നെ ജയിൽ പരിസരത്ത് എത്തിയിരുന്നു.
എന്നാൽ സുരക്ഷ പരിഗണിച്ച് അദ്ദേഹം ചഞ്ചൽഗുഡ ജയിലിന്‍റെ പിന്നിലെ ഗേറ്റിലൂടെയാണ് പുറത്തിറങ്ങിയത്. മനഃപൂർവമല്ലാത്ത നരഹത്യയെന്ന കുറ്റം പ്രഥമദൃഷ്ട്യാ നിലനിൽക്കുമോ എന്നതിൽ സംശയമുണ്ടെന്ന് ഹൈക്കോടതി പറഞ്ഞിരുന്നു.
ഒരു പ്രമോഷന്‍റെ ഭാഗമായി ഒരിടത്ത് നടന്‍ പോയത് കൊണ്ട് അപകടമുണ്ടായെന്ന് പ്രഥമദൃഷ്ട്യാ പറയാന്‍ കഴിയില്ലെന്നും അതിനാല്‍ ജാമ്യം നല്‍കരുതെന്ന സര്‍ക്കാര്‍ വാദം അംഗീകരിക്കാന്‍ സാധിക്കില്ലെന്നും ഹൈക്കോടതി വ്യക്തമാക്കിയിരുന്നു.
