ആലപ്പുഴ: ആസാദി മുദ്രാവാക്യം മുഴക്കി ജെഎൻയു സമരനായകനും സിപിഐ ദേശീയ എക്സിക്യൂട്ടീവ് അംഗവുമായ കനയ്യകുമാർ ആലപ്പുഴയിൽ.
ജില്ലയിലെ എൽഡിഎഫ് സ്ഥാനാർഥികളുടെ തെരഞ്ഞെടുപ്പ് പ്രചാരണത്തിന്‍റെ ഭാഗമായാണ് ജില്ലയിൽ കനയ്യ എത്തിയത്.
ആലപ്പുഴയിലെ എൽഡിഎഫ് സ്ഥാനാർഥി പി.പി. ചിത്തരഞ്ജന്‍റെ വിജയത്തിനായി സംഘടിപ്പിച്ച തെരഞ്ഞെടുപ്പു യോഗത്തിൽ പ്രസംഗത്തിനുശേഷം സദസിൽ നിന്നാണ് മുദ്രാവാക്യം വിളിക്കണമെന്ന് ആവശ്യമുയർന്നത്.
ഉടൻ കനയ്യ ആസാദി മുഴക്കി. നിറഞ്ഞ കൈയടികളോടെയാണ് കാണികൾ അതേറ്റെടുത്തത്.
വർഗീയതയെ തുരത്തുവാനും രാജ്യത്തിന്‍റെ ജനാധിപത്യവും മതനിരപേക്ഷതയും സംരക്ഷിക്കാനും ഇടതുപക്ഷത്തിനു മാത്രമേ സാധിക്കൂവെന്നും അതിനായി കേരളത്തിൽ പിണറായി വിജയൻ നേതൃത്വം നൽകുന്ന ഇടതുമുന്നണി സർക്കാർ അധികാരത്തിൽ എത്തണമെന്നും കനയ്യകുമാർ പറഞ്ഞു.
രാജ്യത്തിനു ഒരിക്കലും മാതൃകയാകാൻ കഴിയാത്ത ഒന്നാണ് ഗുജറാത്ത് മോഡൽ എന്നും അതിനു പകരം വയ്ക്കാൻ കേരള മോഡൽ മാത്രമേയുള്ളൂയെന്നും കേരള മോഡൽ എന്നത് ലോകത്തിനു തന്നെ മാതൃകയാണെന്നും കനയ്യകുമാർ കൂട്ടിച്ചേർത്തു.
ചേർത്തല, ആലപ്പുഴ, ഹരിപ്പാട് മണ്ഡലങ്ങളിലെ ഇടതുമുന്നണി സ്ഥാനാർഥികളുടെ തെരഞ്ഞെടുപ്പ് യോഗങ്ങളിലാണ് കനയ്യ കുമാർ പ്രസംഗിച്ചത്. മൂന്നിടങ്ങളിലും സദസ്യർ കനയ്യയുടെ മുദ്രാവാക്യം ഏറ്റുവിളിച്ചു.
