മലയാള സിനിമയിലെ സൂപ്പര്‍താരം മമ്മൂട്ടിയെ വാനോളം പുകഴ്ത്തി സംവിധായകന്‍ അല്‍ഫോണ്‍സ് പുത്രന്‍.
ഭീഷ്മപര്‍വം സിനിമയിലെ പ്രകടനത്തെ പുകഴ്ത്തിയാണ് സംവിധായകന്‍ രംഗത്തെത്തിയത്. മമ്മൂട്ടിയെ നായകനാക്കി അമല്‍ നീരദ് സംവിധാനം ചെയ്ത ചിത്രം ഭീഷ്മപര്‍വത്തിന് തിയറ്ററുകളില്‍ വളരെ മികച്ച പ്രതികരണമായിരുന്നു ലഭിച്ചത്.
100 ശതമാനം കാണികളെയും പ്രവേശിപ്പിക്കാന്‍ അനുവദിച്ചതിനു ശേഷം തിയറ്ററുകളിലേക്ക് ആദ്യമെത്തിയ ചിത്രമായിരുന്നു ഭീഷ്മ പര്‍വം.
ഭീഷ്മപര്‍വത്തിലെ മമ്മൂട്ടിയുടെ പ്രകടനത്തെ അഭിനന്ദിച്ച് ആയിരുന്നു ഫേസ്ബുക്കില്‍ അല്‍ഫോന്‍സ് കുറിപ്പ് പങ്കുവെച്ചത്.
‘ഭീഷ്മപര്‍വം തകര്‍ത്തു, ഭീഷ്മപര്‍വം ടീമിന് അഭിനന്ദനങ്ങള്‍. സിനിമയ്ക്ക് അടിപൊളി ലുക്കും ഫീലും ഉണ്ടാക്കിയ അമല്‍ നീരദിനോടും ആനന്ദ് സി ചന്ദ്രനോടും പ്രത്യേക സ്‌നേഹം’ എന്നായിരുന്നു അല്‍ഫോന്‍സ് പുത്രന്‍ ഫേസ്ബുക്കില്‍ കുറിച്ചത്.
അല്‍ഫോന്‍സ് പുത്രന്റെ പോസ്റ്റിന് ഒരു ആരാധകന്‍ കുറിച്ച കമന്റ് ഇങ്ങനെ, ‘ലോകസിനിമയിലെ ഏറ്റവും മികച്ച നടന്മാരില്‍ ഒരാളാണ് മമ്മൂട്ടി സര്‍. ഓരോ സിനിമയിലും കഥാപാത്രത്തിന്റെ ആത്മാവ് കൊണ്ടുവരുന്ന അപൂര്‍വം നടന്മാരില്‍ ഒരാള്‍. സ്റ്റാര്‍ഡം ഇല്ലാത്ത അത്ഭുത മനുഷ്യന്‍. മഹാനായ അദ്ദേഹത്തോട് ഒരുപാട് ബഹുമാനവും സ്‌നേഹവും’
ഈ കമന്റിന് അല്‍ഫോന്‍സ് പുത്രന്‍ നല്‍കിയ മറുപടിയാണ് വൈറലായത്. മറുപടി ഇങ്ങനെ, ‘സത്യം. ക്ലിന്റ് ഈസ്റ്റ് വുഡ്, റോബേര്‍ട്ട് ഡി നിറോ, അല്‍ പാച്ചിനോ എന്നിവരേക്കാളും റേഞ്ചുള്ള നടനാണ് അദ്ദേഹം. എന്നെ സംബന്ധിച്ചിടത്തോളം കേരളത്തിലും തമിഴ്‌നാട്ടിലും ലോകത്തിലും തന്നെയുള്ള വില പിടിപ്പുള്ള രത്‌നമാണ് മമ്മൂട്ടി. ഒരുപാട് സ്‌നേഹവും ബഹുമാനവും’ എന്നായിരുന്നു മറുപടി.
