‘യാ​ത്ര​ക്കാ​രു​ടെ ര​ക്ഷ  മാത്ര​മാ​യി​രു​ന്നു ല​ക്ഷ്യം’ കാട്ടാനയെ പേടിച്ച് ബസ് എട്ടു കിലോമീറ്റർ പിന്നോട്ടോടിച്ചു; ടെൻഷൻ നിറഞ്ഞ മണിക്കൂറുകളെക്കു റിച്ച് അംബുജാക്ഷൻ പറയുന്നതിങ്ങനെ…

സ്വ​ന്തം ലേ​ഖ​ക​ൻ
തൃ​ശൂ​ർ: മ​ന​സി​ൽ മു​പ്പ​തി​ല​ധി​കം യാ​ത്ര​ക്കാ​രു​ടെ മു​ഖം മാ​ത്ര​മാ​യി​രു​ന്നു, അ​വ​രെ എ​ങ്ങി​നെ​യെ​ങ്കി​ലും സു​ര​ക്ഷി​ത​മാ​യി എ​ത്തി​ക്കു​ക​യെ​ന്ന​തു മാ​ത്ര​മാ​യി​രു​ന്നു ല​ക്ഷ്യം…

ഷോ​ള​യാ​ർ ആ​ന​മ​ല റോ​ഡി​ൽ ഒ​റ്റ​യാ​ന്‍റെ മു​ന്നി​ൽ പെ​ട്ട ചീ​നി​ക്കാ​സ് എ​ന്ന സ്വ​കാ​ര്യ ബ​സ് എ​ട്ടു കി​ലോ​മീ​റ്റ​റോ​ളം പി​ന്നോ​ട്ടോ​ടി​ച്ച് യാ​ത്ര​ക്കാ​രെ ആ​ന​യു​ടെ ആ​ക്ര​മ​ണ​ത്തി​ൽനി​ന്നു ര​ക്ഷി​ച്ച ബ​സ് ഡ്രൈ​വ​ർ അം​ബു​ജാ​ക്ഷ​ന് റി​വേ​ഴ്സ് യാ​ത്ര റീ​വൈ​ൻ​ഡ് ചെ​യ്തോ​ർ​ക്കു​ന്പോ​ൾ ക​ണ്ണി​ലും വാ​ക്കി​ലും ന​ടു​ക്കം വി​ട്ടൊ​ഴി​യു​ന്നി​ല്ല.

ഇന്നലെ രാവിലെ ഒൻപതിന് ചാലക്കുടി-വാൽപ്പാറ റൂട്ടിൽ അന്പലപ്പാറ മുതൽ ആനക്കയം വരെയാണ് ബസ് പിന്നോട്ടോടിച്ചത്. അംബുജാ ക്ഷന്‍റെ വാക്കുകൾ: മു​പ്പ​തി​ല​ധി​കം യാ​ത്ര​ക്കാ​ർ ബ​സി​ലു​ണ്ടാ​യി​രു​ന്നു. ആ​ന​യെ ക​ണ്ട​തോ​ടെ യാ​ത്ര​ക്കാ​ർ പേ​ടി​ച്ചു.

അ​വ​രെ ശാ​ന്ത​രാ​ക്കി​യി​രു​ത്തി. മു​ന്നോ​ട്ടെ​ടു​ത്താ​ൽ അ​പ​ക​ട​മു​റ​പ്പാ​ണെ​ന്ന് മ​ന​സി​ലാ​യ​തോ​ടെ ര​ണ്ടും ക​ൽ​പ്പിച്ച് ബ​സ് പി​ന്നി​ലേ​ക്കെ​ടു​ത്തു. മു​പ്പ​തു വ​ർ​ഷ​ത്തോ​ള​മാ​യി സ്ഥി​രം പോ​കു​ന്ന റൂ​ട്ടാ​യ​തി​നാ​ൽ വ​ഴി ന​ല്ല പ​രി​ച​യ​മാ​യി​രു​ന്നു.

വ​ള​വും തി​രി​വും ഏ​റെ​യു​ള്ള, വ​ശ​ങ്ങ​ളി​ൽ ആ​ഴ​ത്തി​ലു​ള്ള ഗ​ർ​ത്ത​ങ്ങ​ളു​ള്ള റൂ​ട്ടാ​ണ്. പോ​രാ​ത്ത​തി​ന് വ​ഴി​യി​ൽ മ​റ്റു ടൂ​റി​സ്റ്റ് വ​ണ്ടി​ക​ളും.ക​ണ്ട​ക്ട​ർ ജോ​സും യാ​ത്ര​ക്കാ​രി​ൽ ചി​ല​രും പി​ന്നി​ലെ വ​ണ്ടി​ക​ളോ​ട് വ​ഴി​മാ​റാ​ൻ പ​റ​ഞ്ഞു​കൊ​ണ്ട് റൂ​ട്ട് ക്ലി​യ​ർ ചെ​യ്ത​തോ​ടെ ബ​സ് റി​വേ​ഴ്സ്ഗി​യ​റി​ൽ പാ​ഞ്ഞു.

മു​ന്നി​ൽ നി​ന്നും ഓ​ടി വ​രു​ന്ന ഒറ്റയാൻ ‘ക​ബാ​ലി’​യി​ലേ​ക്കും പി​ന്നി​ലെ വ​ഴി കാ​ണാ​നാ​യി റി​യ​ർ​വ്യൂ മി​റ​റി​ലേ​ക്കും നോ​ക്കി​നോ​ക്കി എ​ട്ടു കി​ലോ​മീ​റ്റ​ർ പി​ന്നി​ലേ​ക്ക് പാ​യു​ക​യാ​യി​രു​ന്നു.

യാ​ത്ര​ക്കാ​രി​ൽ ചി​ല​ർ മൊ​ബൈ​ലി​ൽ ദൃ​ശ്യ​ങ്ങ​ൾ പ​ക​ർ​ത്തു​ന്നു​ണ്ടാ​യി​രു​ന്നു. ഒ​ടു​വി​ൽ ആ​ന​ക്ക​യ​ത്തു വ​ച്ച് ആ​ന കാ​ട്ടി​ലേ​ക്ക് ക​യ​റി​പ്പോ​കും വ​രെ ടെ​ൻ​ഷ​ൻ ത​ന്നെ​യാ​യി​രു​ന്നു.

ആ ​റൂ​ട്ടി​ൽ രാ​വി​ലെ​യാ​യ​തി​നാ​ൽ വ​ണ്ടി​ക​ൾ കു​റ​വാ​യി​രു​ന്നു. എ​ങ്കി​ലും അ​ന്പ​തോ​ളം വാ​ഹ​ന​ങ്ങ​ൾ പി​ന്നോ​ട്ടോ​ടി​ച്ചാ​ണ് ബ​സ് ആ​ന​ക്ക​യം വ​രെ​യെ​ത്തി​യ​ത്.

സു​ര​ക്ഷി​ത​മാ​യ സ്ഥ​ല​ത്ത് ബ​സ് നി​ർ​ത്തി​യ​പ്പോ​ൾ യാ​ത്ര​ക്കാ​ർ കൈയ​ടി​ക്കു​ക​യും ആ​ർ​പ്പു​വി​ളി​ക്കു​ക​യും ചെ​യ്തി​രു​ന്നു. ഞാ​ൻ മ​ന​സി​ൽ എ​ല്ലാ ദൈ​വ​ങ്ങ​ൾ​ക്കും ന​ന്ദി പ​റ​യു​ക​യാ​യി​രു​ന്നു. അ​പ​ക​ട​മൊ​ഴി​വാ​ക്കി​ത്ത​ന്ന​തി​ന്…