തൊടുപുഴ: ഗുരുതര അണുബാധയുണ്ടായ പെണ്‍കുട്ടിയെ കോട്ടയം മെഡിക്കൽ കോളജിൽ കൊണ്ടു പോകാൻ ജില്ലാ ആശുപത്രിയിൽ ആംബുലൻസ് ലഭ്യമാക്കിയില്ലെന്ന് ആരോപണം. എന്നാൽ ആശുപത്രി അധികൃതർ ആരോപണം നിഷേധിച്ചു.
കുടയത്തൂർ സ്വദേശിയായ 19കാരിയുടെ ബന്ധുക്കളാണ് ആരോപണവുമായി രംഗത്തെത്തിയിരിക്കുന്നത്. 30നാണ് പെണ്‍കുട്ടിയെ ആശുപത്രിയിൽ പ്രവേശിപ്പിച്ചത്.
ഗുരുതര അണുബാധയായതിനാൽ കോട്ടയം മെഡിക്കൽ കോളജിലേക്ക് റെഫർ ചെയ്തു. എന്നാൽ ഇതിനായി ആശുപത്രിയിലെ ആംബുലൻസ് ലഭ്യമാക്കിയില്ലെന്നാണ് ആരോപണം.
നിർധനരായ കുടുംബം ഒടുവിൽ സ്വകാര്യ വാഹനത്തിൽ കോട്ടയം മെഡിക്കൽ കോളജിലേക്ക് പോകുകയായിരുന്നു. ഡോക്ടറുടെ ഭാഗത്തുനിന്നു മോശം സമീപനമാണുണ്ടായതെന്നും കുട്ടിയുടെ മാതാവ് പറഞ്ഞു.
എന്നാൽ, ആംബുലൻസ് സേവനം നിഷേധിച്ചില്ലെന്നും പെണ്‍കുട്ടിക്ക് 18 വയസിൽ കൂടുതലായതിനാൽ അപേക്ഷ നൽകാൻ നിർദേശിക്കുകയാണ് ചെയ്തതെന്നും ആശുപത്രി സൂപ്രണ്ട് പറഞ്ഞു. പെണ്‍കുട്ടിയെ ഇന്നലെ അടിയന്തര ശസ്ത്രക്രിയയ്ക്ക് വിധേയയാക്കി.
