അടൂര്‍: ഓട്ടം കാത്തു കിടക്കുന്നതിനിടെ, ടേണിനെചൊല്ലി ആംബുലന്‍സ് ഡ്രൈവര്‍മാര്‍ തമ്മിലുണ്ടായ സംഘര്‍ഷത്തിനിടെ ഒരാള്‍ക്ക് പരിക്കേറ്റ സംഭവത്തില്‍ മൂന്നു പേരെ അടൂര്‍ പോലീസ് അറസ്റ്റ് ചെയ്തു.
കഴിഞ്ഞദിവസം രാത്രി 10.30 ന് അടൂര്‍ ജനറല്‍ ആശുപത്രിയ്ക്ക് മുന്നിലെ ആംബുലന്‍സ് സ്റ്റാന്‍ഡിലാണ് സംഭവം, അടിപിടിയില്‍ പരിക്കേറ്റ ഡ്രൈവര്‍ ശ്രീലേഷിന്‍റെ പരാതിയെ തുടര്‍ന്ന് രജിസ്റ്റര്‍ ചെയ്ത കേസിലാണ് അറസ്റ്റ്.
ചിരണിക്കല്‍ പള്ളിതാഴേതില്‍ ശ്യാം പ്രകാശ് (25) പിറവന്തൂര്‍ പുരുഷ മംഗലത്ത് രാഹുല്‍(28), കൊടുമണ്‍ ഈറമുരുപ്പല്‍ സുനില്‍ ഭവനില്‍ സുബിന്‍ (25) എന്നിവരാണ് പിടിയിലായത്. ഇവരെ കോടതിയില്‍ ഹാജരാക്കി റിമാന്‍ഡ് ചെയ്തു.
നേരത്തെയും ആംബുലന്‍സ് ഡ്രൈവര്‍മാര്‍ തമ്മില്‍ ടേണിനെ സംബന്ധിച്ച് തര്‍ക്കങ്ങളും സംഘര്‍ഷവും ഉണ്ടായിട്ടുണ്ട്.
ആംബുലന്‍സ് ഡ്രൈവര്‍മാരെ രാത്രികാലങ്ങളില്‍ പരിശോധിക്കുക, ഇവര്‍ക്ക് പോലീസ് ക്ലിയറന്‍സ് സര്‍ട്ടിഫിക്കറ്റ് നിര്‍ബന്ധമാക്കുക തുടങ്ങിയ നടപടികള്‍ ഊര്‍ജിതമാക്കണമെന്ന് ജില്ലാ പോലീസ് മേധാവി നിര്‍ദേശിച്ചു.
