കോട്ടയം: ഹണിട്രാപ്പ് കേസ് അന്വേഷണത്തിൽ പോലീസ് പിടിയിലാകാനുള്ള കോട്ടയത്തെ ഗുണ്ടാതലവനുമായി ബന്ധപ്പെട്ട ആരോപണത്തിൽ കോട്ടയം വെസ്റ്റ് സ്റ്റേഷനിലെ രണ്ടു എഎസ്ഐമാരെ സ്ഥലം മാറ്റിയതിനു പിന്നിൽ പോലീസിലെ പടലപ്പിണക്കം.
ഒരു ഉന്നത ഉദ്യോഗസ്ഥൻ എഎസ്ഐമാരെ മനഃപൂർവം കുടുക്കിയതാണെന്നും ആരോപണമുണ്ട്. ഗുണ്ടാതലവനെ പിടികൂടുന്നതിനായി ഇയാളുടെ കാമുകിയേയും അന്വേഷണസംഘം ചോദ്യം ചെയ്തിരുന്നുവെങ്കിലും കാര്യമായ വിവരങ്ങൾ ലഭിച്ചിരുന്നില്ല.
നിലവിൽ ഹണിട്രാപ്പ് ആസൂത്രണം ചെയ്ത ഗുണ്ടാതലവനെക്കുറിച്ചു യാതൊരു സൂചനയുമില്ലാതെ ഇരുട്ടിൽ തപ്പുകയാണ് അന്വേഷണ സംഘം.
അതേസമയം ഗുണ്ടാതലവന് ഉന്നത ഉദ്യോഗസ്ഥനുമായിട്ടുള്ള അടുപ്പം മൂലമാണ് അറസ്റ്റ് വൈകുന്നതെന്നും ആരോപണമുണ്ട്.
ഏതാനും ദിവസങ്ങൾക്കു മുന്പു ഗുണ്ടാതലവന്‍റെ രഹസ്യ കേന്ദ്രത്തെക്കുറിച്ചു വിവരം ലഭിച്ചതിന്‍റെ അടിസ്ഥാനത്തിൽ പോലീസ് എത്തിയെങ്കിലും ഇയാൾ രക്ഷപ്പെടുകയും ചെയ്തിരുന്നു.
ഗുണ്ടാതലവനുമായി നിരന്തരം ബന്ധപ്പെട്ടെന്ന കാരണത്താൽ എഎസ്ഐമാരെ സ്ഥലംമാറ്റിയതു ഉന്നത ഉദ്യോഗസ്ഥനുമായി ഗുണ്ടാതലവനുള്ള ബന്ധം പുറത്തുവരാതിരിക്കാനാണെന്നും പറയപ്പെടുന്നു.
