ബ്രിട്ടനില്‍ നിന്നെത്തിയ ഇന്ത്യക്കാരുടെ മനസ്സ് കീഴടക്കിയ നടി എമി ജാക്‌സണ്‍ വിവാഹിതയാവുന്നു. ബ്രിട്ടീഷുകാരനായ ബിസിനസുകാരന്‍ ജോര്‍ജ് പനയ്യോട്ടുവാണ് വരന്‍. ജോര്‍ജുമായുള്ള വിവാഹ നിശ്ചയം കഴിഞ്ഞ വിവരം ഇന്‍സ്റ്റഗ്രാമിലൂടെയാണ് എമി ആരാധകരെ അറിയിച്ചത്. ജോര്‍ജ് തന്റെ കവിളില്‍ ഉമ്മ വയ്ക്കുന്ന ചിത്രവും എമി പോസ്റ്റ് ചെയ്തിട്ടുണ്ട്. ”ജനുവരി ഒന്ന്, 2019. ഞങ്ങളുടെ ജീവിതത്തില പുതിയ തുടക്കം. ലോകത്തിലെ ഏറ്റവും സന്തോഷവതിയായ പെണ്‍കുട്ടിയായി എന്നെ മാറ്റിയതില്‍ ഒരുപാട് നന്ദി”, ഇതാണ് എമി ഇന്‍സ്റ്റഗ്രാമില്‍ കുറിച്ചത്.
എമിയും ജോര്‍ജും 2015 മുതല്‍ പ്രണയത്തിലായിരുന്നു. ഇരുവരും പ്രണയത്തിലാണെന്ന് ഗോസിപ്പുകള്‍ പരന്നെങ്കിലും അവയൊക്കെ എമി നിഷേധിച്ചിരുന്നു. ജോര്‍ജിനൊപ്പമുളള ചിത്രങ്ങള്‍ സോഷ്യല്‍ മീഡിയയില്‍ എമി ജാക്‌സണ്‍ പോസ്റ്റ് ചെയ്തിരുന്നുവെങ്കിലും അവയിലൊന്നും മുഖം വ്യക്തമായിരുന്നില്ല. കഴിഞ്ഞ വാലന്റൈന്‍സ് ദിനത്തിലാണ് ജോര്‍ജുമായുള്ള ചിത്രം പങ്കുവച്ച് എമി തന്റെ പ്രണയം പുറംലോകത്തെ അറിയിച്ചത്. ബ്രിട്ടനിലെ കോടീശ്വരനും എബിലിറ്റി ഗ്രൂപ്പിന്റെ സ്ഥാപകനുമായ ആന്‍ഡ്രിയാസ് പനയ്യോട്ടിന്റെ മകനാണ് ജോര്‍ജ്. ബ്രിട്ടനില്‍ പനയ്യോട്ട് ഗ്രൂപ്പിന് നിരവധി ആഡംബര ഹോട്ടലുകളുണ്ട്.
രജനീകാന്ത് നായകനായ 2.0 യിലാണ് എമി ജാക്‌സണ്‍ അവസാനമായി അഭിനയിച്ചത്. 2011 ല്‍ പുറത്തിറങ്ങിയ മദിരാശി പട്ടണം എന്ന തമിഴ് സിനിമയിലൂടെയാണ് എമി ജാക്‌സണ്‍ സിനിമയിലേക്ക് കടന്നുവന്നത്. പിന്നീട് തമിഴ്, തെലുങ്ക്, ഹിന്ദി,ഇംഗ്ലീഷ് സിനിമകളിലും വേഷമിട്ടു. ഹോളിവുഡില്‍ സൂപ്പര്‍ഗേള്‍ എന്ന വെബ് സീരിസിലും അഭിനയിച്ചു. മുമ്പ് ഹിന്ദി നടന്‍ പ്രതീക് ബബ്ബാറുമായി പ്രണയത്തിലായിരുന്ന എമി ആ ബന്ധം തകര്‍ന്നതിനു ശേഷമാണ് ജോര്‍ജുമായി അടുത്തത്.
