യുവനടി അനിഖ സുരേന്ദ്രനെതിരേ സൈബർ ആക്രമണം. കഴിഞ്ഞ ദിവസം തന്‍റെ പുതിയ സിനിമയായ കപ്പിന്‍റെ പ്രൊമോഷന് പരിപാടിയില്‍ പങ്കെടുക്കാനെത്തിയിരുന്നു അനിഖ. പരിപാടിയുടെ വീഡിയോ സോഷ്യല്‍ മീഡിയയില്‍ വൈറലായി മാറുകയാണ്. ഈ വീഡിയോയില്‍ താരം ധരിച്ച വസ്ത്രമാണ് സോഷ്യല്‍ മീഡിയയുടെ വിമര്‍ശനങ്ങളും പരിഹാസവുമൊക്കെ നേരിടുന്നത്.
കറുത്ത ടോപ്പും റിപ്ഡ് ജീന്‍സുമായിരുന്നു അനിഖയുടെ വേഷം. പക്ഷെ താരത്തിന്‍റെ വേഷം സോഷ്യല്‍ മീഡിയയിലെ സദാചാരവാദികള്‍ക്ക് ഇഷ്ടമായില്ല. പിന്നാലെ കമന്‍റിലൂടെ താരത്തിനെതിരേ രംഗത്ത് എത്തുകയായിരുന്നു ഇക്കൂട്ടർ. നിരവധി പേരാണ് കമന്‍റിലൂടെ താരത്തെ വിമര്‍ശിക്കുന്നത്. പരിഹാസവും ട്രോളും മാത്രമല്ല ദ്വയാര്‍ഥ പ്രയോഗങ്ങളും അനിഖയ്ക്കെതിരേ സോഷ്യല്‍ മീഡിയയിലൂടെ നടത്തുന്നുണ്ട്.
ബാലതാരമായി സിനിമയിലെത്തിയ നടിയാണ് അനിഖ. ജയറാമും മംമ്ത മോഹന്‍ദാസും പ്രധാന വേഷങ്ങളിലെത്തിയ കഥ തുടരുന്നു ആയിരുന്നു ആദ്യ സിനിമ. അധികം വൈകാതെ തെന്നിന്ത്യയാകെ നിറഞ്ഞു നില്‍ക്കുന്ന ബാലതാരമായി മാറുകയായിരുന്നു. അഞ്ചു സുന്ദരികളിലെ പ്രകടനത്തിന് മികച്ച ബാലതാരത്തിനുള്ള സംസ്ഥാന ചലച്ചിത്ര പുരസ്കാരവും അനിഖയെ തേടിയെത്തിയിരുന്നു.
തമിഴില്‍ അജിത്ത്, നയന്‍താര തുടങ്ങിയ താരങ്ങള്ക്കൊപ്പം അഭിനയിച്ച് കൈയടി നേടി. മലയാളത്തിലും മമ്മൂട്ടിയടക്കമുള്ളവർക്കൊപ്പം അഭിനയിച്ചിട്ടുണ്ട്. നയന്‍താരയുടെ മകളായും ചെറുപ്പകാലവുമൊക്കെ അഭിനയിച്ച് കൈയടി നേടിയതോടെ ജൂനിയർ നയന്‍താര എന്ന പേരും അനിഖ നേടിയിട്ടുണ്ട്.
മലയാള ചിത്രം കപ്പേളയുടെ തെലുങ്ക് റീമേക്കായ ബുട്ട ബൊമ്മയിലൂടെയാണ് അനിഖ നായികയാകുന്നത്. പിന്നീട് ഓ മൈ ഡാർലിംഗ് എന്ന ചിത്രത്തിലൂടെ മലയാളത്തിലും നായികയായി എത്തി. ധനുഷ് സംവിധാനം ചെയ്യുന്ന നീക്ക്, വാസുവിന്‍ ഗർഭിണികൾ തുടങ്ങിയ സിനിമകളാണ് അണിയറയിലുള്ളത്.
സോഷ്യല്‍ മീഡിയയിലെ താരമാണ് അനിഖ. താരം പങ്കുവയ്ക്കാറുള്ള ചിത്രങ്ങളും വീഡിയോകളും വൈലായി മാറാറുണ്ട്. അതേസമയം ബാലതാരമായി സിനിമയിലെത്തിയ അനിഖയെ ഇപ്പോഴും പലരും ആ കണ്ണിലൂടെയാണ് കാണുന്നത്. അതുകൊണ്ട് ഗ്ലാമറസായുള്ള വേഷങ്ങള്‍ ധരിച്ചെത്തുമ്പോള്‍ പലപ്പോഴും അനിഖയ്ക്ക് സോഷ്യല്‍ മീഡിയയില്‍ നിന്നു മോശം അനുഭവങ്ങളുണ്ടാകാറുണ്ട്. എങ്കിലും കമന്റുകളെയൊന്നും വകവയ്ക്കാതെ മുന്നോട്ടുപോവുകയാണ് അനിഖ.
