സീമ മോഹൻലാൽ
കൊച്ചി: “കൊറോണ വൈറസിന്‍റെ രോഗവാഹകയായിരിക്കുമോ എന്ന ആശങ്കയുണ്ടായിരുന്നു. അതുമായി ഇന്ത്യയിലേക്ക് പോരാൻ എനിക്ക് താൽപര്യമില്ലായിരുന്നു. അതുകൊണ്ടുതന്നെ പേടിപ്പിക്കുന്ന അവസ്ഥയിലും ചൈനയിൽ തന്നെ തങ്ങി. ഇപ്പോൾ ഇവിടെ സ്്ഥിതിഗതികൾ ശാന്തമായി തുടങ്ങി…”
ചൈനീസ് അ്ക്കാദമി ഓഫ് സയൻസ് ദി ഇൻസ്റ്റിറ്റ്യൂട്ട് ഓഫ് ഹൈഡ്രോ ബയോളജിയിലെ പോസ്റ്റ് ഡോക്ട്രൽ റിസർച്ചറായ പത്തനംതിട്ട സ്വദേശി അനില.പി അജയന്‍റെ വാക്കുകളാണിത്. ചൈനയിൽ നിന്ന് രാഷ്ട്രദീപികയോട് സംസാരിക്കുകയായിരുന്നു ഈ പെണ്‍കുട്ടി.
രാവും പകലും തലങ്ങും വിലങ്ങും ആംബുലൻസുകൾ പായുന്നതിന്‍റെയും ഉയർന്നുവരുന്ന മരണസംഖ്യയുടെയും പേടിപ്പെടുത്തുന്ന അവസ്ഥയിലും രാജ്യസുരക്ഷയോർത്ത് ഈ പെണ്‍കുട്ടി ചൈനയിൽ തന്നെ തങ്ങി.
കേരളത്തിലേക്ക് മടങ്ങാൻ വീട്ടുകാർ നിർബന്ധിച്ചെങ്കിലും അനില തയാറായില്ല. കൊറോണ വൈറസ് തനിക്ക് പിടിപ്പെട്ടിട്ടുണ്ടെങ്കിൽ അതുമായി ഇന്ത്യയിലേക്ക് വരേണ്ടെന്ന ഉറച്ച നിലപാടായിരുന്നു അനിലയെ ചൈനയിൽ തന്നെ നിൽക്കാൻ പ്രേരിപ്പിച്ചത്. രോഗബാധയുണ്ടായില്ല. ഈ പെണ്‍കുട്ടി 76 ദിവസം ഹോം ക്വാറന്‍റൈനിലായിരുന്നു. അനിലയുടെ വാക്കുകളിലേക്ക്…
“”ഞാൻ 2019 സെപ്റ്റംബറിലായിരുന്നു വുഹാനിൽ എത്തിയത്. ജനുവരിയുടെ തുടക്കത്തിലാണ് ഇവിടെ കൊറോണ വൈറസിന്‍റെ വ്യാപ്നത്തെക്കുറിച്ച് കേട്ടുതുടങ്ങിയത്. ശ്വസനേന്ദ്രീയ വ്യൂഹത്തെ ബാധിക്കുന്ന വൈറസ് ആണെന്ന് അറിവുള്ളതുകൊണ്ടുതന്നെ ക്ലാസിൽ പോകുന്പോൾ ഞാൻ മാ്സ്ക് ധരിക്കുമായിരുന്നു.
തുടക്കത്തിൽ അധികം പ്രശ്നമൊന്നും തോന്നിയിരുന്നില്ല. പക്ഷേ കോവിഡ് കേസുകൾ വർധിച്ചതോടെ ചെറിയ പേടി തോന്നി. ഇവിടത്തെ പൊതുഗതാഗതം ഉപയോഗിച്ച് ഞാൻ യാത്ര ചെയ്തിരുന്നു. ആ ആഴ്ച മുഴുവനും വുഹാൻ യൂണിവേഴ്സിറ്റി കാന്‍റീനിൽ നിന്നായിരുന്നു ഭക്ഷണം കഴിച്ചത്. അവിടെ എപ്പോഴും തിരക്കാണ്.
വിന്‍റർ സീസണും അയിരുന്നു. അതുകൊണ്ടുതന്നെ എനിക്കും രോഗം വരുമോയെന്ന് ഞാൻ സംശയിച്ചു. മരണസംഖ്യ ഉയർന്നതോടെ കോളജും അടച്ചു. ചൈനയുടെ പ്രാന്ത പ്രദേശങ്ങളിൽ ഉള്ള സഹപാഠികളൊക്കെ നാട്ടിലേക്കു മടങ്ങി. ആദ്യമൊക്കെ ഇവിടത്തെ അവ്സ്ഥ ഞാൻ വീട്ടിൽ പറഞ്ഞിരുന്നില്ല.
ഇവിടത്തെ വാർത്തകൾ മാധ്യമങ്ങളിലൂടെ അറിഞ്ഞതോടെ ഞാനും കേരളത്തിലേക്ക് മടങ്ങാൻ വീട്ടുകാർ നിർബന്ധിച്ചു. ഇന്ത്യൻ എംബസിയുടെ ഇവാക്യുവേഷൻ പ്രോഗ്രാമിൽ പങ്കെടുക്കാൻ വീട്ടുകാർ നിർബന്ധിച്ചു. പക്ഷേ എനിക്ക് വൈറസ് ബാധ ഉണ്ടായിട്ടുണ്ടെങ്കിൽ അതുമായി ഇന്ത്യയിലേക്ക് വരാൻ ഞാൻ ആഗ്രഹിച്ചില്ല.
അതുകൊണ്ടുതന്നെ ഭീതിപ്പെടുത്തുന്ന അവസ്ഥയിലും ഞാൻ ചൈനയിൽ തന്നെ തുടർന്നു. അനിലയുടെ വാക്കുകളിൽ ഭീതി നിഴലിക്കുന്നു.
ജനുവരി 21-നായിരുന്നു ഞാൻ അവസാനമായി കാന്പസിനു പുറത്തുപോയത്. പിന്നീട് 76 ദിവസം ഹോം ക്വാറന്‍റൈനിലായിരുന്നു. ദൈവാനുഗ്രഹത്താൽ രോഗമൊന്നും ഉണ്ടായില്ല.
ഇവിടെ മരണസംഖ്യ ഉയരുന്നത് എന്നെ പേടിപ്പെടുത്തി. എങ്ങും ആംബുലൻസുകളുടെ ശബ്ദ്ം മാത്രം. ഇന്ത്യയിൽ പ്രത്യേകിച്ച് നമ്മുടെ കേരളത്തിൽ നിന്നു കൊറോണയുടെ പേടിപ്പെടുത്തുന്ന വാർത്ത കേട്ടപ്പോൾ ശരിക്കും ഭയം തോന്നി. അനിലയുടെ വാക്കുകളിൽ നാടിനോടുള്ള സ്നേഹം നിഴലിക്കുന്നു.
ഏപ്രിൽ എട്ടു മുതൽ ഇവിടെ മാറ്റങ്ങൾ കണ്ടു തുടങ്ങി.കൊറോണ വൈറസിന്‍റെ പ്രഭവ കേന്ദ്രമായ വുഹാൻ പഴയ സ്ഥിതിയിലേക്കായി. ഞങ്ങൾക്ക് ക്ലാസുകൾ ആരംഭിച്ചു. പൊതുഗതാഗതം തുറന്നെങ്കിലും ബസുകളിലൊക്കെ ചുരുക്കം യാത്രക്കാർ മാത്രം. ഗ്രീൻ ഹെൽത്ത് കോഡ് ഉള്ളവർക്കേ പൊതുഗതാഗത സംവിധാനം ഉപയോഗിക്കാനാവൂ.
ഷോപ്പിംഗ് നടത്തുന്നതിനും പ്രത്യേക മാനദണ്ഡമുണ്ട്. തെർമൽ സ്ക്രീനിംഗ് നിർബന്ധമാണ്. 37 ഡിഗ്രി സെൽഷ്യസിൽ കൂടുതൽ ശരീര താപനില ഉള്ളവർക്ക് കടയ്ക്കുളളിൽ കയറാൻ സാധിക്കില്ല. റോഡുകളും പൊതുസ്ഥലങ്ങളും നിത്യവും അണുവിമുക്തമാക്കുന്നുണ്ട്.
ഓഫീസുകളിലും മറ്റു സ്ഥാപനങ്ങളിലും പോകുന്നവർ നിർദേശങ്ങൾ കർശനമായി പാലിക്കണം. ഓഫീസിലും സ്ഥാപനങ്ങളിലും കയറുന്പോഴും ഇറങ്ങുന്പോഴും തെർമൽ സ്ക്രീനിംഗു നടത്തും. സാമൂഹിക അകലം പാലിക്കണം. ഓണ്‍ലൈൻ മീറ്റിംഗ് മാത്രമേ അനുവദിക്കൂ.
വീട്ടിനുള്ളിലു ഓഫീസിലുമൊക്കെ മാസ്ക് ധരിക്കണമെന്നും നിർബന്ധമുണ്ട്. കൊറോണയുടെ ആദ്യഘട്ടത്തിലുണ്ടായ ഭീതി ഒഴിഞ്ഞു തുടങ്ങി. എങ്കിലും എല്ലാവരും ജാഗ്രതയിലാണ്. ഇന്ത്യയിൽ പ്രത്യേകിച്ച് നമ്മുടെ കേരളീയർ സുരക്ഷ നിർദേശങ്ങൾ പാലിക്കണമെന്നാണ് ഈ അവസരത്തിൽ പറയാനുള്ളത്. അനില പറഞ്ഞു.
പത്തനംതിട്ട ഇലവുംതിട്ട ബീം ജ്യോതിയിൽ പി.ടി അജയകുമാർ- കെ. നിർമല ദന്പതികളുടെ മകളാണ് അനില.
