തിരുവനന്തപുരം ∙ വഴുതക്കാട് ഈശ്വരവിലാസം റോഡിലെ ‘അഞ്ജനം’ ഇനി എ.കെ.ആന്റണിയുടെ വീട് മാത്രമല്ല, ഒരു വക്കീൽ ഓഫിസ് കൂടിയാണ്.
കോൺഗ്രസിന്റെ ഏറ്റവും മുതിർന്ന നേതാവായ ആന്റണി സജീവ രാഷ്ട്രീയം വിട്ട് അഞ്ജനത്തിൽ താമസമാക്കിയിട്ട് 7 മാസമായി.
അഞ്ജനത്തിന്റെ മുകൾ നിലയിൽ എലിസബത്തിന്റെ വക്കീൽ ഓഫിസ് പുതുവർഷത്തിൽ തുറക്കും.
അടുത്തവർഷം നിയമപഠനം കഴിഞ്ഞെത്തുന്ന ഇളയ മകൻ അജിത്ത് കൂടി അമ്മയ്ക്കൊപ്പം ചേരുന്നതോടെ അഞ്ജനത്തിന് അഭിഭാഷക മേൽവിലാസം ഉറയ്ക്കും.
എ.കെ. ആന്റണിയും നിയമബിരുദധാരിയാണ്. ബാങ്ക് ഉദ്യോഗസ്ഥയായിരിക്കെ 1993–96 ൽ തിരുവനന്തപുരം ലോ അക്കാദമിയിലെ സായാഹ്ന ബാച്ചിൽ പഠിച്ചാണ് എലിസബത്ത് നിയമബിരുദമെടുത്തത്.
ബാങ്കിൽനിന്നു വിരമിച്ചശേഷം 2012 ൽ ഡൽഹിയിൽ മുതിർന്ന അഭിഭാഷക ബീന മാധവന്റെ ജൂനിയറായി പ്രാക്ടിസ് തുടങ്ങി.
വക്കീൽ ഓഫിസ് വീട്ടിൽ തന്നെയാകട്ടെ എന്നു തീരുമാനിച്ചതിനു രണ്ടു കാരണങ്ങളുണ്ട്. ഒന്ന്, വീട്ടിലാകുമ്പോൾ ഒഴിവുള്ള സമയങ്ങളിൽ ചിത്രരചനയും നടക്കും. രണ്ട്, വീട്ടിൽ ആന്റണി ഒറ്റയ്ക്കാവില്ല.
