തെന്നിന്ത്യൻ താരസുന്ദരി അനുഷ്ക ഷെട്ടിയുടെ പ്രതിഫലം അഞ്ചുകോടി ആയതായി റിപ്പോർട്ടുകൾ. പുതിയ ചിത്രത്തിൽ അഭിനയിക്കുന്നതിനാണ് താരം വൻപ്രതിഫലം ആവശ്യപ്പെട്ടതത്രേ. ഇതോടെ തെന്നിന്ത്യയിൽ ഏറ്റവും ഉയർന്ന പ്രതിഫലം വാങ്ങുന്ന നടിയായി അനുഷ്ക മാറുകയാണ്.
തെന്നിന്ത്യൻ നായികമാരിൽ ഏറ്റവും ഉയർന്ന പ്രതിഫലം വാങ്ങി വന്നിരുന്നത് നയൻതാരയായിരുന്നു. നയൻതാരയെ ആണ് അനുഷ്ക ഷെട്ടി പ്രതിഫല കാര്യത്തിൽ തോല്പിച്ചിരിക്കുന്നത്. ബാഹുബലി എന്ന ചിത്രത്തിലൂടെ സിനിമ ആസ്വാദകരുടെ ഹൃദയത്തിൽ ഇടം നേടിയതോടെയാണ് അനുഷ്കയുടെ ഡിമാൻഡ് കൂടിയത്.
ചരിത്ര കഥാപാത്രങ്ങൾക്കൊപ്പം ഗ്ലാമർ റോളുകളും കരുത്തുറ്റ വേഷങ്ങളും അനുഷ്കയെ തേടിയെത്തുന്നുണ്ട്. ഇപ്പോൾ പ്രതിഫലത്തിന്‍റെ കാര്യത്തിലും മറ്റ് നായികമാരേക്കാൾ ബഹുദൂരം മുന്നിലായി അനുഷ്ക.നയൻതാരയുടെ ഡോറയുടെ തോൽവിയും അറത്തിന്‍റെ ശരാശരി വിജയവുമാണ് നയൻസിനെ പിന്നിലാക്കിയത്.
അനുഷ്കയുടെ ബാഗമതി കളക്ഷൻ റെക്കോർഡുകൾ നേടി വൻകുതിപ്പിലാണ്. അമേരിക്കയിൽ പ്രദർശിപ്പിച്ച ചിത്രം ഒരു മില്ല്യണ്‍ ഡോളറാണ് നേടിയത്. കൈനിറയെ ചിത്രങ്ങളാണ് അനുഷ്കയെ തേടിവരുന്നതും. നയൻതാരയ്ക്കു ലഭിക്കേണ്ട അവസരങ്ങളും അനുഷ്കയെ തേടിവരുന്നുണ്ടെന്നാണ് റിപ്പോർട്ട്. ജ്യോതിക നായികയായി തമിഴിലെത്തിയ നാച്ചിയാറിന്‍റെ തെലുങ്ക് പതിപ്പിൽ അനുഷ്കയാണ് നായിക.
