ആദ്യമായി അര്‍ജന്‍റീനയുടെ ഒന്നാം നമ്പര്‍ ഗോള്‍കീപ്പറായി ഇറങ്ങിയ ഫ്രാങ്കോ അര്‍മാനി നിരാശപ്പെടുത്തിയില്ല. നിര്‍ണായകമത്സരത്തില്‍ നൈജീരിയയ്‌ക്കെതിരേ അര്‍ജന്‍റീനയുടെ വലകാത്തത് അര്‍മാനിയായിരുന്നു. വിക്ടര്‍ മോസസിന്‍റെ പെനല്‍റ്റി വഴങ്ങിയതൊഴിച്ചാല്‍ അര്‍മാനി മികച്ച പ്രകടനം തന്നെയാണ് കാഴ്ചവച്ചത്.
അര്‍ജന്‍റീനയുടെ ആദ്യ രണ്ടു മത്സരങ്ങളില്‍ വല കാത്ത വില്ലി കാബലെറോയ്ക്കു പകരമാണ് അര്‍മനിയെ ഇറക്കിയത്. കാബലെറോയുടെ മണ്ടത്തരമാണ് ക്രൊയേഷ്യക്കെതിരേയുള്ള മത്സരത്തില്‍ അർജന്‍റീനയെ തോല്‍പ്പിച്ചത്. നിര്‍ണായക മത്സരത്തില്‍ത്തന്നെ അരങ്ങേറ്റം കുറിക്കേണ്ടിവന്ന അര്‍മാനി ഒരു ആശങ്കയും കാണിക്കാതെ മത്സരം ഗംഭീരമാക്കി. ഗോളെന്നുറപ്പിച്ച ഷോട്ടുകള്‍ രക്ഷപ്പെടുത്താനും തട്ടിയകറ്റാനും അര്‍മാനിക്കാകയും ചെയ്തു.
