ചെന്നൈ: നടൻ വിവേക് ഒബ്റോയിയുടെ ഭാര്യാ സഹോദരൻ ആദിത്യ ആൽവ അറസ്റ്റിലായി.
ബംഗളൂരു മയക്കുമരുന്ന് കേസിൽ ചെന്നൈയിൽ നിന്നാണ് ആദിത്യയെ സെൻട്രൽ ക്രൈംബ്രാഞ്ച് അറസ്റ്റ് ചെയ്തത്. ബംഗളൂരു മയക്കുമരുന്ന് കേസിലെ ആറാം പ്രതിയായ ആദിത്യ ആൽവ മാസങ്ങളായി ഒളിവിലായിരുന്നു.
മുൻമന്ത്രി ജീവരാജ് ആൽവയുടെ മകനാണ്. സിനിമാ താരങ്ങൾ ഉൾപ്പെട്ട ലഹരിമരുന്നു കേസിൽ മയക്കുമരുന്ന് എത്തിച്ചിരുന്നത് ആദിത്യയാണെന്നാണ് പോലീസിന്‍റെ വിലയിരുത്തൽ.
ആദിത്യയെ കണ്ടെത്താനായി ക്രൈംബ്രാഞ്ച് പ്രത്യേക സംഘങ്ങൾ രൂപീകരിച്ച് രാജ്യത്ത് പരിശോധന നടത്തി വരികയായിരുന്നു. രഹസ്യ വിവരത്തെതുടർന്ന് നടത്തിയ റെയ്ഡിലാണ് ആദിത്യ ആൽവ പിടിയിലായത്.
ഒരു സിനിമാ നടിയും കസ്റ്റഡിയിലായതായി റിപ്പോർട്ടുകളുണ്ട്. ആദിത്യയെ കണ്ടെത്തുന്നതിനായി സഹോദരി ഭർത്താവായ നടൻ വിവേക് ഒബ്റോയിയുടെ വീട്ടിലും പോലീസ് റെയ്ഡ് നടത്തിയിരുന്നു.
നേരത്തെ ആദിത്യ ആൽവയുടെ ബംഗളൂരുവിലെ വസതിയിൽ സിസിബി നടത്തിയ റെയ്ഡിൽ മയക്കുമരുന്ന് കണ്ടെടുത്തിരുന്നു.
ലഹരി മരുന്ന് കേസുമായി ബന്ധപ്പെട്ട് നടിമാരായ രാഗിണി ദ്വിവേദി, സഞ്ജന ഗൽറാണി തുടങ്ങിയവരും അറസ്റ്റിലായിരുന്നു.
