മൂവാറ്റുപുഴ: ബന്ധുവിന്‍റെ ചിത്രം അശ്ലീലം കലർത്തി മോർഫ് ചെയ്തു സമൂഹ മാധ്യമങ്ങളിൽ പ്രചരിപ്പിച്ച കേസിൽ വിദേശത്തേക്കു കടന്ന സ്ത്രീയെ പോലീസ് അറസ്റ്റു ചെയ്തു. മൂവാറ്റുപുഴ സ്വദേശി ജാസ്മിനെയാണ് നെടുന്പാശേരി വിമാനത്താവളത്തിൽ നിന്നു അറസ്റ്റു ചെയ്തത്. നാലു വർഷം മുന്പാണ് സംഭവം നടന്നത്.
അശ്ലീലം കലർന്ന ചിത്രങ്ങൾ സമൂഹ മാധ്യമങ്ങളിൽ പ്രചരിപ്പിച്ചുവെന്ന ജാസ്മിന്‍റെ ബന്ധുവിന്‍റെ പരാതിയെ തുടർന്നു മൂവാറ്റുപുഴ പോലീസ് കേസ് രജിസ്റ്റർ ചെയ്തിരുന്നു. അന്വേഷണം ആരംഭിച്ചപ്പോൾ ജാസ്മിൻ വിദേശത്തേക്കു കടക്കുകയായിരുന്നു. തുടർന്നു പോലീസ് ലുക്ക് ഔട്ട് നോട്ടീസ് പുറപ്പെടുവിച്ചു.
ഇവർ നാട്ടിലേക്കു മടങ്ങുന്നെന്ന വിവരത്തെ തുടർന്നു പോലീസ് നെടുന്പാശേരി വിമാനത്താവളത്തിൽ കാത്തു നിൽക്കുകയായിരുന്നു. പ്രിൻസിപ്പൽ എസ്ഐ ജി.പി. മനുരാജിന്‍റെ നേതൃത്വത്തിലുള്ള പോലീസ് സംഘമാണ് അറസ്റ്റു ചെയ്തത്. മൂവാറ്റുപുഴ സ്റ്റേഷനിൽ എത്തിച്ചു ചോദ്യം ചെയ്ത ശേഷം പ്രതിയെ കോടതിയിൽ ഹാജരാക്കി.
