പറവൂർ: സിനിമയിൽ അഭിനയിക്കാൻ അവസരം നൽകാമെന്നു പറഞ്ഞു കബളിപ്പിക്കുകയും ഭീഷണിപ്പെടുത്തി പണംതട്ടാൻ ശ്രമിക്കുകയും ചെയ്ത യുവാവ് പിടിയിൽ. പാലക്കാട്, ഒറ്റപ്പാലം, വാണിയംകുളം സ്വദേശി വാഴയിൽ പ്രസാദി(32)നെയാണ് വടക്കേക്കര പോലീസ് അറസ്റ്റ് ചെയ്തത്. സംവിധായകൻ എന്ന വ്യാജേന “നിള പറഞ്ഞ കഥ’എന്ന സിനിമയിൽ അഭിനയിക്കാൻ പുതുമുഖങ്ങളെ ആവശ്യമുണ്ട് എന്ന ഫേസ്ബുക്ക് പോസ്റ്റിട്ടാണു യുവാവ് കെണിയൊരുക്കിയത്.
അഭിനയ മോഹവുമായെത്തിയ യുവതിയുടെ ഫോട്ടോകൾ വാങ്ങിയ ശേഷം യുവതിക്ക് വിവാഹ വാഗ്ദാനം നൽകുകയും സിനിമ പിടിക്കുന്നതിനായി ലക്ഷങ്ങൾ ആവശ്യപ്പെടുകയുമായിരുന്നു. എന്നാൽ, പണം നല് കാൻ വിസമ്മതിച്ചതോടെ ചിത്രങ്ങൾ മോശമായ രീതിയിൽ ഇന്‍റർനെറ്റിൽ പ്രചരിപ്പിക്കുമെന്നു ഭീഷണിപ്പെടുത്തി. യുവതിയുടെ അമ്മ നൽകിയ പരാതി പ്രകാരം പ്രതിയെ ഒറ്റപ്പാലത്തെ വീട്ടിൽനിന്നു പിടികൂടുകയായിരുന്നു. എസ്‌സിപിഒ പി.കെ. ഹരി, എസ്‌സിപിഒ രാജേഷ്, സിപിഒ ബിജു എന്നിവർ ഉൾപ്പെട്ട സംഘമാണു പ്രതിയെ പിടികൂടിയത്.
