ആലപ്പുഴ: വാഹന പരിശോധന നടത്തിയ ട്രാഫിക്ക് എസ്ഐയെയും പോലീസുകാരെയും അസഭ്യം പറഞ്ഞ് കയ്യേറ്റം ചെയ്യാൻ ശ്രമിച്ച മൂന്ന് യുവാക്കളെ പോലീസ് അറസ്റ്റ് ചെയ്തു. കൊറ്റംകുളങ്ങര മുനീർമണ്‍സിലിൽ മുനീർ(21), ആത്തിക്കഉമ്മ മ‍ൻസിലിൽ മുഹമ്മദ് സുൾഫിക്കർ(23), ഇയാളുടെ സഹോദരൻ മുഹമ്മദ് സലീൽ(21) എന്നിവരെയാണ് നോർത്ത് പോലീസ് അറസ്റ്റ് ചെയ്തത്.
ഇന്നലെ രാവിലെ 11ന് എസ്ഐ മോഹൻദാസിന്റെ നേതൃത്വത്തിൽ ജില്ലാ കോടതി പാലത്തിന് സമീപം വാഹന പരിശോധന നടത്തുന്പോഴാണ് യുവാക്കളുടെ അഴിഞ്ഞാട്ടം. ഹെൽമെറ്റ് ഇല്ലാതെ മൂന്നു പേർ കയറിയ ബൈക്ക് പോലീസ് തടയുകയായിരുന്നു. അസഭ്യം പറഞ്ഞ് കൈയേറ്റം ചെയ്യാൻ ശ്രമിച്ച മൂന്ന് പേരെയും എസ്ഐയും മറ്റ് പോലീസുകാരും ചേർന്ന് തടഞ്ഞു വച്ച ശേഷം നോർത്ത് പോലീസിൽ വിവരം അറിയിച്ചു.
ഡ്യൂട്ടി തടസപ്പെടുത്തൽ, കൈയേറ്റശ്രമം, അസഭ്യം പറച്ചിൽ ഉൾപ്പെടെയുള്ള കുറ്റങ്ങൾ ചുമത്തി കേസ് എടുത്തു. പിന്നീട് പ്രതികളെ കോടതിയിൽ ഹാജരാക്കി.
