കടുത്തുരുത്തി: ആഡംബര കാറിൽ കടത്താൻ ശ്രമിച്ച ലക്ഷങ്ങൾ വിലമതിക്കുന്ന എം.ഡി.എം.എ. വിഭാഗത്തിൽപ്പെട്ട മാരക മയക്കുമരുന്നുമായി രണ്ടു യുവാക്കളെ എക്സൈസ് പിടികൂടി.
അതിരമ്പുഴ വാമനപുരം വീട്ടിൽ താഹിർ ഷാഹുൽ (25), ആർപ്പൂക്കര ഷാനു മനസിൽ വീട്ടിൽ ബാദുഷാ കെ.നസീർ(28) എന്നിവരാണ് പിടിയിലായത്. കടുത്തുരുത്തി എക്സൈസ് റേഞ്ച് ഇൻസ്പെക്ടർ രാഗേഷ്. ബി.ചിറയത്തിന്‍റെ നേതൃത്വത്തിലുള്ള സംഘമാണ് പ്രതികളെ പിടികൂടിയത്.
ഇന്നലെ വൈകിട്ട് അഞ്ചോടെ കുറുപ്പന്തറ ബസ് സ്റ്റാൻഡിനു സമീപം റോഡരികിൽ നിന്നാണ് മയക്കുമരുന്നുമായി പ്രതികൾ പിടിയിലായത്.
രക്ഷപ്പെടാൻ ശ്രമം
കടുത്തുരുത്തി എക്സൈസ് പട്രോളിംഗ് സംഘത്തെ കണ്ട് പ്രതികൾ കാർ അതിവേഗം പിന്നോട്ടെടുത്ത് രക്ഷപ്പെടാൻ ശ്രമിക്കവെ കാർ മൈൽ കുറ്റി തകർത്ത് ഓടയിൽ താഴുകയായിരുന്നു.
ഇവരുടെ പക്കൽ നിന്നും 18.800 ഗ്രാം മയക്കുമരുന്നും കെ.എൽ.17. എസ്-3557 രജിസ്റ്റർ നമ്പരിലുള്ള സിലേറിയ കാറും രണ്ട് ഐഫോണുകളും കണ്ടെടുത്തു.
അഞ്ചു ലക്ഷത്തോളം രൂപ വിലവരുന്ന എം.ഡി.എം.എ. വിഭാഗത്തിൽപ്പെട്ട മയക്കുമരുന്നാണിതെന്ന് എക്സൈസ് ഇൻസ്പെക്ടർ പറഞ്ഞു.
