ഈരാറ്റുപേട്ട: അരുവിത്തുറ സ്വദേശിനിയായ പെണ്‍കുട്ടിയെ വിവാഹവാഗ്ദാനം നൽകി പീഡിപ്പിച്ച സംഭവത്തിൽ പോലീസ് അറസ്റ്റ് ചെയ്യുകയും പിന്നീട് ജാമ്യത്തിലിറങ്ങുകയും ചെയ്ത യുവാവ് വീണ്ടും അറസ്റ്റിലായി.
ജാമ്യത്തിലിറങ്ങിയശേഷം, പെണ്‍കുട്ടിയുടെ സ്വകാര്യ വീഡിയോകളും ചിത്രങ്ങളും പ്രചരിപ്പിച്ചതിനെ തുടർന്നാണ് യുവാവിനെ വീണ്ടും പോലീസ് അറസ്റ്റ് ചെയ്തത്. ആലുവ ഈസ്റ്റ് കുടങ്ങല്ലൂർ ഭാഗം പ്ലാറ്റിയേലത്ത് ശ്രീഹരി പി. സുന്ദരം ആണ് പിടിയിലായത്.
വിവാഹിതനും ഒരു കുട്ടിയുടെ പിതാവുമായ പ്രതി ഈരാറ്റുപേട്ട സ്വദേശിനിയായ പെണ്‍കുട്ടിയെ വിവാഹിതനാണെന്ന കാര്യം മറച്ചു വച്ച് വിവാഹവാഗ്ദാനം നൽകി ലൈംഗികമായി പീഡിപ്പിച്ചുവെന്ന കേസിൽ മാർച്ച് 17 നാണ് ആദ്യം അറസ്റ്റിലായത്.
2018 ലാണ് കാക്കനാട്ടെ ലോഡ്ജിൽവച്ച് പീഡനം നടത്തിയത്. രഹസ്യമായി ഇതിന്‍റെ വീഡിയോ പകർത്തി അതുപയോഗിച്ച് ഭീഷണിപ്പെടുത്തി സെപ്റ്റംബർ, നവംബർ മാസങ്ങളിൽ എറണാകുളത്തെ ലോഡ്ജുകളിൽ പലതവണ പീഡനം തുടർന്നു. ഇതിനൊപ്പം അശ്ലീല വീഡിയോയും ചിത്രങ്ങളും പ്രചരിപ്പിക്കുകയും ചെയ്തു.
പെണ്‍കുട്ടിയുടെ പരാതിയിൽ ശ്രീഹരിയെ അറസ്റ്റ് ചെയ്തു കോടതിയിൽ ഹാജരാക്കുകയും ജാമ്യത്തിൽ വിട്ടയയ്ക്കുകയും ചെയതിരുന്നു. പിന്നീടും പ്രതി പെണ്‍കുട്ടിയുടെ ഫോട്ടോകളും വീഡിയോകളും പ്രചരിപ്പിച്ചതിനെത്തുടർന്നാണ് കഴിഞ്ഞദിവസം കേസെടുത്തത്.
ഈരാറ്റുപേട്ട ഇൻസ്പെക്ടർ എസ്എച്ച്ഒ ബൈജുകുമാർ, എഎസ്ഐ ഷാബുമോൻ ജോസഫ്, സിപിഒമാരായ ജോമി, അശ്വതി എന്നിവർ ചേർന്നാണ് പ്രതിയെ അറസ്റ്റ് ചെയ്തത്.
