ചടയമംഗലം : വധശ്രമം അടക്കം നിരവധി ക്രിമിനല്‍ കേസുകളില്‍ പ്രതിയും സഹായിയുമടക്കം രണ്ടുപേരെ പോലീസ് അറസ്റ്റ് ചെയ്തു. ആയുർ കുഴിയം സ്വദേശി സാൻജോ ജോൺസൺ, ഇയാളുടെ സഹായി ആയൂർ സ്വദേശി കണ്ണൻ എന്നു വിളിക്കുന്ന അഖിൽ എന്നിവരേയാണ് ചടയമംഗലം പോലീസ് അറസ്റ്റ് ചെയ്തത്.
രണ്ടാഴ്ച മുമ്പ് ചടയമഗലം സ്വദേശിനിയായ യുവതിയെ ആക്രമിക്കാന്‍ ശ്രമിച്ച കേസിലാണ് സാൻജോ ജോൺസണും, അഖിലിനുമെതിരെ പോലീസ് കേസെടുത്തത്. തുടര്‍ന്ന്‍ നടന്ന അന്വേഷണത്തില്‍ സാൻജോ ജോൺസൺ നിരവധി ക്രിമിനൽ കേസുകളിലെ പ്രതിയും ചടയമംഗലം കൊട്ടാരക്കര പൂയപ്പള്ളി തുടങ്ങിയ സ്റ്റേഷനുകളിലായി നാല് കൊലപാതകശ്രമം കേസുകൾ ഇയാളുടെ പേരിൽ രജിസ്റ്റർ ചെയ്തിട്ടുണ്ടെന്ന് മനസിലായത്..
ഇതോടെ ഇയാളെ കണ്ടെത്താന്‍ ചടയംഗലം സര്‍ക്കിള്‍ ഇന്‍സ്പെക്ടര്‍ സാജു എസ് ദാസ്, എസ്ഐ ഗോപകുമാർ എന്നിവരുടെ നേതൃത്വത്തിൽ പ്രത്യേക സംഘം രൂപീകരിച്ച് അന്വേഷണം ആരംഭിക്കുകയായിരുന്നു.അന്വേഷണം പുരോഗമിക്കവേ കഴിഞ്ഞ ദിവസം പ്രതികള്‍ മാങ്കുളത്ത് ഒളിവില്‍ താമസിക്കുന്നതായി വിവരം ലഭിച്ച പോലീസ് ഇവരെ അറസ്റ്റ് ചെയ്യുകയായിരുന്നു.
അറസ്റ്റ് രേഖപ്പെടുത്തിയ പ്രതികളെ കോടതിയില്‍ ഹാജരാക്കി റിമാന്‍റ് ചെയ്തു. സാൻജോ ജോൺസനെ ഗുണ്ട ലിസ്റ്റില്‍പെടുത്താന്‍ കളക്ടര്‍ക്ക് റിപ്പോര്‍ട്ട് നല്‍കുമെന്ന് ചടയമംഗലം പോലീസ് പറഞ്ഞു
