നെടുമങ്ങാട്: ആഡംബര കാറിൽ ചുറ്റിനടന്ന് സ്കൂൾ കുട്ടികൾക്ക് പുകയില ഉത്പന്നങ്ങൾ വിൽക്കുന്ന യുവാവ് അറസ്റ്റിൽ.
പുല്ലമ്പാറ കുറ്റിമൂട് പിച്ചി മംഗലം ജംഗ്ഷന് സമീപം എസ്എസ് മൻസിലിൽ ഷംനാദ്(33) ആണ് നെടുമങ്ങാട് ഗവ. ഗേൾസ് ഹയർ സെക്കൻഡറി സ്കൂൾഡ പരിസരത്തു നിന്ന് അറസ്റ്റിലായത്.
ആഡംബര കാറും പിടിച്ച് എടുത്തിട്ടുണ്ട്. രണ്ടര ലക്ഷത്തോളം രൂപ വിലവരുന്ന പുകയില ഉത്പന്നങ്ങളാണ് ഇയാളിൽ നിന്നും പിടിച്ചെടുത്തത്.
നെടുമങ്ങാട് ഭാഗത്തെ സ്കൂൾ, കോളജ് പരിസരങ്ങളിൽ ലഹരി ഉത്പന്നങ്ങൾ വിൽക്കുന്നത് തടയുന്നതിനുള്ള പ്രത്യേക പരിശോധനയുടെ ഭാഗമായി നടത്തിയ അന്വേഷണത്തിലാണ് ഇയാൾ അറസ്റ്റിലായത്.
തുടർന്നും വ്യാപകമായ പരിശോധന നടത്തുമെന്ന് പോലീസ് അറിയിച്ചു.ജില്ലാ പോലീസ് മേധാവി ദിവ്യ ഗോപിനാഥ് ഐപിഎസിന്‍റെ നിർദേശാനുസരണം നാർകോട്ടിക് ഡിവൈഎസ്പി രാസിത്ത്, നെടുമങ്ങാട് ഡിവൈഎസ്പി എം.കെ. സുൽഫിക്കർ എഎസ്എച്ച്ഒ എസ്. സന്തോഷ് കുമാർ എന്നിവരുടെ നേതൃത്വത്തിലുള്ള സംഘമാണ് ഇയാളെ അറസ്റ്റ് ചെയ്തത്.
