ചെറുവത്തൂർ: ഓട്ടോയിൽ കയറിയ യുവതിയോട് അസഭ്യവാക്കുകൾ പറഞ്ഞതിനെത്തുടർന്നു യുവതി ഓട്ടോയിൽ നിന്നും ചാടിയ സംഭവത്തിൽ ഓട്ടോ ഡ്രൈവർ അറസ്റ്റിൽ. കൊഴുമ്മൽ സ്വാമിമുക്കിലെ അഞ്ചില്ലത്ത് എ.ജി. ഷാനവാസ്(21)നെയാണ് ചന്തേര എസ്ഐ കെ.വി. ഉമേശനും സംഘവും അറസ്റ്റ് ചെയ്തത്.
തോട്ടം ഗേറ്റിനടുത്തു നിന്നും ഓട്ടോയിൽ കയറിയ വീട്ടമ്മയായ യുവതിയോട് ഡ്രൈവർ അപമര്യാദയോടെ സംസാരിക്കാൻ തുടങ്ങിയപ്പോൾ ഒാട്ടോ നിർത്താൻ യുവതി ആവശ്യപ്പെട്ടുവെങ്കിലും വേഗത കൂട്ടി ഓടിക്കാൻ തുടങ്ങിയതോടെ ഓട്ടോറിക്ഷയിൽ നിന്നും യുവതി റോഡരികിലേക്ക് ചാടുകയായിരുന്നു. പരിക്കേറ്റ യുവതി മംഗളൂരു ആശുപത്രിയിൽ ആഴ്ചകളായി ചികിത്സയിലായിരുന്നു.
നവംബർ 24ന് നടന്ന സംഭവത്തിൽ പ്രദേശത്തെ സ്ഥാപനങ്ങളിലെ സിസിടിവി ദൃശ്യങ്ങളും ദൃക്‌സാക്ഷികളുടെ മൊഴികളുടെ അടിസ്ഥാനത്തിൽ പിലിക്കോട്, ചെറുവത്തൂർ, കാലിക്കടവ് ഓട്ടോ സ്റ്റാൻഡുകളിലെ ഓട്ടോകളും സ്വകാര്യ ഓട്ടോകളും നിരീക്ഷിച്ച പോലീസ് ഒടുവിൽ സ്വകാര്യ ഓട്ടോയാണ് സംഭവത്തിന് പിന്നിലെന്ന് കണ്ടെത്തുകയായിരുന്നു.
ഇതിന്‍റെഭാഗമായി കാഞ്ഞങ്ങാട്, പയ്യന്നൂർ, തളിപ്പറമ്പ് ആർടിഒയിൽരജിസ്ട്ര് ചെയ്ത പ്രൈവറ്റ് ബജാജ് ഓട്ടോകളുടെ വിവരങ്ങൾ ശേഖരിച്ചാണ് യുവാവിനെ വലയിലാക്കിയത്. ഏതാണ്ട് 35 ൽപ്പരം ഓട്ടോകളും 20 സിസിടിവി ദൃശ്യങ്ങളും പരിശോധിച്ചാണ് കേസിന് തുമ്പുണ്ടാക്കിയത്. ഷാനവാസിനെ ഹൊസ്ദുർഗ് മജിസ്ട്രേറ്റ് കോടതിയിൽ ഹാജരാക്കി 14 ദിവസത്തേക്ക് റിമാൻഡ് ചെയ്തു.
