പന്തളം: കടയ്ക്കാട്ട് കടയില്‍ കയറി മോഷണം നടത്തിയ ആളെ മണിക്കൂറുകള്‍ക്കുള്ളില്‍ പന്തളം പോലീസ് പിടികൂടി. കഴിഞ്ഞ ദിവസം ഉച്ചകഴിഞ്ഞ് മൂന്നോടെ കടയ്ക്കാട് കൂടത്തിനാല്‍ വടക്കേതില്‍ ഷെമീറിന്‍റെ കടയ്ക്കാട് ഉള്ള പലചരക്കുകടയില്‍ കയര്‍ വാങ്ങാന്‍ എന്ന വ്യാജേന കയറി വില ചോദിച്ച ഇയാള്‍ മേശപ്പുറത്തിരുന്ന പഴ്‌സ് കൈക്കലാക്കി കാറില്‍ കയറി രക്ഷപ്പെടുകയായിരുന്നു.
തുടര്‍ന്ന് ഷെമീര്‍ പോലീസില്‍ പരാതി നല്‍കി.പത്തനംതിട്ട ജില്ലാ പോലീസ് മേധാവി ആര്‍. നിശാന്തിനിയുടെ നിര്‍ദ്ദേശ പ്രകാരം അടൂര്‍ ഡിവൈഎസ്പി ആര്‍. ബിനുവിന്‍റെ മേല്‍നോട്ടത്തില്‍ പ്രത്യേക സ്‌ക്വാഡ് രൂപവത്കരിച്ച് ദ്രുതഗതിയില്‍ അന്വേഷണം ആരംഭിച്ചു.
തുടര്‍അന്വേഷണത്തില്‍ കൊല്ലം കുണ്ടറ സ്വദേശിയും അമ്പലപ്പുഴ ഹെല്‍ത്ത് സെന്‍ററിനു സമീപം അബി ഭവനില്‍ വാടകയ്ക്ക് താമസിക്കുന്ന ശ്യംകുമാറിനെ (32) പന്തളം പോലീസ് ഇന്‍സ്‌പെക്ടര്‍ എസ്. ശ്രീകുമാറിന്‍റെ നേതൃത്വത്തില്‍ അമ്പലപ്പുഴയില്‍ നിന്നു പിടികൂടി.
മാവേലിക്കര ഭാഗത്തു നിന്നും പത്തനംതിട്ടയിലേക്ക് പോകുന്ന വഴിയാണ് ഇയാള്‍ ഷെമീറിന്‍റെ കടയില്‍ മോഷണം നടത്തിയതെന്ന് പോലീസ് പറഞ്ഞു. കടയില്‍ ആ സമയത്ത് ഷെമീറിന്‍റെ അമ്മ ഷെരിഭാ ബീവി മാത്രമേ ഉണ്ടായിരുന്നുളളൂ. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.
