ന്യൂഡൽഹി: സഹപാഠികളായ പെണ്‍കുട്ടികളുടെ ചിത്രങ്ങള്‍ മോര്‍ഫ് ചെയ്ത് അവരെ എങ്ങനെ മാനഭംഗം ചെയ്യാം എന്നുള്‍പ്പടെയുള്ള അശ്ലീല ചര്‍ച്ചകള്‍ സമൂഹമാധ്യമങ്ങളിൽ കൂടി നടത്തിയ സംഭവത്തില്‍ ഒരാള്‍ അറസ്റ്റില്‍. ഡല്‍ഹിയിലെ പ്രശസ്തമായ സ്‌കൂളിലെ വിദ്യാര്‍ഥിയെയാണ് പോലീസ് പിടികൂടിയത്.
“ബോയിസ് ലോക്കര്‍ റൂം’ എന്ന പേരില്‍ ഇന്‍സ്റ്റഗ്രാമിലും സ്‌നാപ് ചാറ്റിലുമാണ് പതിനൊന്നും പന്ത്രണ്ടും ക്ലാസുകളിലെ വിദ്യാര്‍ഥി സംഘം ഗ്രൂപ്പുണ്ടാക്കിയത്. ഡല്‍ഹിയിലെ ഒരു വിദ്യാര്‍ഥിനിയാണ് സംഭവം പുറത്തുകൊണ്ടുവന്നത്.
അറസ്റ്റിലായ വിദ്യാര്‍ഥിയുടെ മൊബൈല്‍ ഫോണ്‍ ഡല്‍ഹി സൈബര്‍ സെല്‍ പിടിച്ചെടുത്തു. ഈ ഗ്രൂപ്പിലുണ്ടായിരുന്ന 20 വിദ്യാര്‍ഥികളെ തിരിച്ചറിഞ്ഞിട്ടുണ്ട്. ഡല്‍ഹിയിലെ വളരെ പ്രശസ്തമായ അഞ്ച് സ്‌കൂളുകളിലെ പതിനൊന്നും പന്ത്രണ്ടും ക്ലാസുകളിലെ വിദ്യാര്‍ഥികളാണ് ഈ ഗ്രൂപ്പിലുണ്ടായിരുന്നവരെന്നാണ് കരുതുന്നത്.
ഗ്രൂപ്പുമായി ബന്ധപ്പെ‌‌ട്ട വിവരങ്ങൾ സ്ക്രീൻ ഷോട്ടുകൾ സഹിതം സ്കൂൾ വിദ്യാർഥിനിയായ ഒരു പെൺകുട്ടി ട്വിറ്ററിൽ പോസ്റ്റ് ചെയ്തതോടെയാണ് സംഭവം പുറത്തറിഞ്ഞത്. ഗ്രൂപ്പിലുള്ളവരുടെ ലിസ്റ്റ് പെൺകുട്ടി പുറത്തുവിട്ടിരുന്നു.
തുടർന്ന് നിരവധിയാളുകൾ ഇത് സമൂഹമാധ്യമങ്ങളിൽ ഷെയർ ചെയ്തു. ഈ ഗ്രൂപ്പ് പിന്നീട് ഡിആക്ടിവേറ്റ് ചെയ്തു. വിവരങ്ങൾ പുറത്ത് വിട്ട പെൺകുട്ടിക്ക് ബോയിസ് ലോക്കർ റൂം എന്ന ഗ്രൂപ്പിലെ അംഗങ്ങളിൽ നിന്നും ഭീഷണിയുണ്ടായതായും റിപ്പോർട്ടുകളുണ്ട്.
