കട്ടപ്പന: സ്കൂൾ വിദ്യാർഥിനിയെ ഉപദ്രവിച്ച അധ്യാപകന് പോക്സോ കേസിൽ എട്ടുവർഷം കഠിന തടവും 50,000 രൂപ പിഴയും.
ജില്ലയിലെ ഒരു സർക്കാർ സ്കൂളിലെ അധ്യാപകനായിരുന്ന അയ്യപ്പൻകോവിൽ തെരുവേൽ വിൽസണ്‍ തോമസിനെ(57) ആണ് കട്ടപ്പന പോക്സോ കോടതി ജഡ്ജി ഫിലിപ്പ് തോമസ് ശിക്ഷിച്ചത്.
2015ൽ ഉപ്പുതറ എസ്ഐ ആയിരുന്ന ടോമി ജോസഫ് ചാർജ് ചെയ്ത കേസിലാണ് കോടതി ശിക്ഷ വിധിച്ചത്. ആറു പെണ്‍കുട്ടികളുടെ മൊഴി പ്രകാരമായിരുന്നു കേസ്.
വിസ്താരവേളയിൽ അഞ്ചുപേർ മൊഴി മാറ്റിയെങ്കിലും പരാതിയിൽ ഉറച്ചുനിന്ന ഒരു പെണ്‍കുട്ടിയുടെ മൊഴി പ്രകാരം ശിക്ഷ വിധിക്കുകയായിരുന്നു.
ഐപിസി 354 വകുപ്പ് പ്രകാരം രണ്ടുവർഷം കഠിന തടവും 10,000 രൂപ പിഴയും പോക്സോ ആക്ട് അനുസരിച്ച് ആറുവർഷം കഠിന തടവും 40,000 രൂപ പിഴയുമാണ് ശിക്ഷ. പബ്ലിക് പ്രോസിക്യൂട്ടർ അഡ്വ. സുസ്മിത ജോണ് ഹാജരായി.
