കോട്ടയം: ഇൻസ്റ്റഗ്രാം വഴി പരിചയപ്പെട്ട പ്രായപൂർത്തിയാകാത്ത പെണ്‍കുട്ടിയെ പ്രണയം നടിച്ച് പീഡിപ്പിക്കുകയും സ്വർണവും പണവും തട്ടിയെടുക്കുകയും ചെയ്ത പ്രതിക്കെതിരേ നിരവധി കേസുകൾ.
മുന്പ് കഞ്ചാവ് കടത്തലടക്കം നിരവധി കേസുകളാണ് 21 കാരനായ പ്രതിയുടെ പേരിൽ വിവിധ സ്റ്റേഷനുകളിലുള്ളത്. ആലപ്പുഴ പഴവീട് കൂട്ടുങ്കൽ എസ്. അരുണ്‍ (21) ആണ് ഇന്നലെ ഈസ്റ്റ് പോലീസ് പിടികൂടിയത്. പോക്സോ നിയമ പ്രകാരം കേസെടുത്ത പ്രതിയെ ഇന്നലെ കോടതിയിൽ ഹാജരാക്കിയിരുന്നു.
ഇൻസ്റ്റഗ്രാം വഴി പരിചയപ്പെട്ട പെണ്‍കുട്ടിയെ പ്രണയം നടിച്ചാണ് പ്രതി വശത്താക്കിയത്. തുടർന്നു ലൈംഗിക പീഡനം നടത്തുകയും പലപ്പോഴായി എട്ടു പവൻ സ്വർണവും 20,000 രൂപയും തട്ടിയെടുക്കുകയായിരുന്നു.
കുറച്ചു നാളായി പ്രതിയായ അരുണ്‍ പെണ്‍കുട്ടിയുമായി ബന്ധം പുലർത്തിവരികയായിരുന്നു. സ്വർണവും പണവും നഷ്ടപ്പെടതിൽ സംശയ തോന്നിയ വീട്ടുകാർ അന്വേഷണം നടത്തി.
തുടർന്നു പെണ്‍കുട്ടിയെ കൗണ്‍സിലിംഗിനു വിധേയമാക്കി. ഇതോടെയാണ് പീഡന വിവരം പുറത്തറിയുന്നത്. തുടർന്നു വീട്ടുകാർ പോലീസിൽ പരാതി നൽകുകയായിരുന്നു.പ്രതിയെക്കുറിച്ചു മനസിലാക്കിയ പോലീസ് സംഘം ഇയാളെ വീട്ടിലെത്തി അറസ്റ്റ് ചെയ്യുകയായിരുന്നു.
വാഹനാപകടത്തിൽ പരിക്കേറ്റു വീട്ടിൽ വിശ്രമത്തിലായിരുന്ന പ്രതിയെ ഡിവൈഎസ്പി എം. അനിൽകുമാറിന്‍റെ നേതൃത്വത്തിൽ ഈസ്റ്റ് പോലീസ് എസ്ഐ പി.ടി. ബിജോ അടങ്ങുന്ന സംഘം അറസ്റ്റ് ചെയ്യുകയായിരുന്നു.പ്രതിയെ 14 ദിവസത്തേക്കു കോടതി റിമാൻഡ് ചെയ്തു. ൾ
