ചിങ്ങവനം: പ്രായപൂർത്തിയാകാത്ത പെണ്‍കുട്ടിയെ വിവാഹ വാഗ്ദാനം നൽകി ലൈംഗികമായി പീഡിപ്പിച്ച കേസിൽ യുവാവിനെ പോക്സോ നിയമപ്രകാരം ചിങ്ങവനം പോലീസ് അറസ്റ്റു ചെയ്തു. പൂഞ്ഞാർ തലനാട് നെല്ലുവേലിൽ ആശിഷ് സോണി(26)യെയാണ് അറസ്റ്റിലായത്.
നാഗന്പടം ബസ് സ്റ്റാൻഡിൽവച്ചു പരിചയപ്പെട്ട പെണ്‍കുട്ടിയെ വിവാഹം കഴിക്കാമെന്നു പറഞ്ഞു വിശ്വസിപ്പിച്ച് കുറിച്ചി ഭാഗത്തുള്ള കപ്പത്തോട്ടത്തിൽ കൊണ്ടുപോയി പീഡിപ്പിക്കുകയായിരുന്നു. ഇയാൾ പാലാ, ഏറ്റുമാനൂർ, ഗാന്ധിനഗർ, കളമശേരി എന്നീ പോലീസ് സ്റ്റേഷൻ പരിധിയിൽ ബൈക്ക് മോഷണകേസിലും പ്രതിയാണ്.
ചിങ്ങവനം പോലീസ് സ്റ്റേഷൻ എസ്എച്ച്ഒ ബിൻസ് ജോസഫിന്റെ നേതൃത്വത്തിൽ എസ്ഐമാരായ അബ്ദുൾ ജലീൽ, വിപിൻ ചന്ദ്രൻ, എം.എസ്. ഷെറി, സിപിഒമാരായ ഡെന്നി പി. ജോമി, സന്തോഷ് എന്നിവർ ചേർന്ന് തലനാട് ഭാഗത്തുനിന്നാണ് പ്രതിയെ അറസ്റ്റ് ചെയ്തത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
