മുംബൈ: 2023 ഏഷ്യൻ ഗെയിംസിനുള്ള ഇന്ത്യൻ പുരുഷ ക്രിക്കറ്റ് ടീമിനെ വി.വി.എസ്. ലക്ഷ്മൺ പരിശീലിപ്പിക്കും. ശിഖർ ധവാനായിരിക്കും ടീം ക്യാപ്റ്റൻ എന്നാണ് ലഭിക്കുന്ന റിപ്പോർട്ട്.
2023 ഐസിസി ഏകദിന ലോകകപ്പിന്‍റെ സമയത്താണ് ഏഷ്യൻ ഗെയിംസ് എന്നതിനാൽ ഇന്ത്യ രണ്ടാനിര ടീമിനെയാണ് അയയ്ക്കുക. സെപ്റ്റംബർ 23 മുതൽ ഒക്ടോബർ എട്ട്‌വരെയാണ് ഏഷ്യൻ ഗെയിംസ്. ഇന്ത്യ ആതിഥേയത്വം വഹിക്കുന്ന ഏകദിന ലോകകപ്പ് ഒക്ടോബർ അഞ്ചിന് ആരംഭിക്കും.
ഒന്പത് വർഷത്തെ ഇടവേളയ്ക്കുശേഷമാണ് ഏഷ്യൻ ഗെയിംസിൽ ക്രിക്കറ്റ് തിരിച്ചെത്തുന്നത്. ഇന്ത്യ പുരുഷ-വനിതാ ടീമിനെ അയയ്ക്കാൻ ധാരണയായിട്ടുണ്ട്. ഇതാദ്യമായാണ് ഇന്ത്യൻ ടീം ഏഷ്യൻ ഗെയിംസിൽ പങ്കെടുക്കാനൊരുങ്ങുന്നത്.
