ബോളിവുഡ് സൂപ്പർ സ്റ്റാർ കരീന കപൂറാണ് സോഷ്യൽ മീഡിയയിൽ ഇപ്പോൾ സംസാരവിഷയം. 2001-ൽ പുറത്തിറങ്ങിയ ‘അശോക’ എന്ന ചിത്രത്തിലെ കരീനയുടെ ഐക്കോണിക്ക് ലുക്കിൻ്റെ പുനരുജ്ജീവനമാണ് ഇപ്പോൾ ട്രെൻഡിംഗിൽ.
‘അശോക ട്രെൻഡ്’ എന്ന ഈ ട്രെൻഡിൽ ബ്രൈഡൽ മെക്കോവറുകൾ ചെയ്യുന്ന ഇൻസ്റ്റഗ്രാം ഇൻഫ്ലുവൻസേഴ്സ്, ദക്ഷിണേഷ്യൻ ബ്രൈഡൽ ശൈലികളിൽ നിന്ന് പ്രചോദനം ഉൾക്കൊണ്ടുള്ള മേക്കപ്പാണ് വീഡിയോയിൽ അവതരിപ്പിക്കുന്നത്.
ഇൻസ്റ്റാഗ്രാം ട്രെൻഡുകൾ വരുന്നു, പോകുന്നു, എന്നാൽ ഇവയിൽ ചിലത് ആഗോള തലത്തിൽ വൈറലാകാറുണ്ട്. അത്തരത്തിലൊന്നായി മാറി‍യിരിക്കുകയാണ് അശോക ട്രെൻഡ്.
ബോൾഡ് നിറങ്ങൾ, വലിയ ആഭരണങ്ങൾ എന്നിവയൊക്കെ ട്രൻഡിന്‍റെ എടുത്ത് പറയേണ്ട ഘടകങ്ങളാണ്. ഇൻഫ്ലുവൻസേഴ്സ് ‘അശോക’യിലെ ‘സാൻ സനന’ എന്ന ഗാനത്തിന് അഭിനയിച്ചുകൊണ്ടാണ് മേക്കപ്പിടുന്നത്.
ഇന്ത്യയിൽ തുടങ്ങിയ ഈ ഇൻസ്റ്റാഗ്രാം റീൽസ് ട്രെൻഡ് ഇപ്പോൾ ലോകമെമ്പാടും ഏറ്റെടുത്തിരിക്കുകയാണ്. ‘അശോക’ ലുക്കിൽ തങ്ങളുടേതായ വ്യത്യസ്തകളും ഇൻഫ്ലുവൻസേഴ്സ് കൊണ്ടുവരുന്നുണ്ട്. അശോക ചക്രവർത്തിയുടെ ആദ്യകാല ജീവിതം ചിത്രീകരിക്കുന്ന ബോളിവുഡ് ചിത്രമാണ് ‘അശോക’. ഷാരൂഖ് ഖാനും കരീന കപൂറും അഭിനയിച്ച ഈ ചിത്രം അന്താരാഷ്ട്ര ചലച്ചിത്രമേളകളിൽ അംഗീകാരം നേടുകയും നിരൂപക പ്രശംസ നേടുകയും ചെയ്തു.
