കോട്ടയം: കുറ്റിക്കാട്ടിൽ അസ്ഥികൂടം കണ്ടെത്തി. നാട്ടകം മറിയപ്പള്ളി ഇന്ത്യൻ പ്രസിനു പിന്നിലെ കാട് പിടിച്ചു കിടക്കുന്ന പുരയിടത്തിൽ നിന്നുമാണ് അസ്ഥി കൂടം കണ്ടെത്തിയത്.
പുരയിടത്തിലെ പുളിമരത്തിന്‍റെ ചുവട്ടിലായാണ് അസ്ഥികൂടം കിടക്കുന്നത്. ഇന്നു രാവിലെ പുരയിടത്തിലെ കാട് വെട്ടിത്തെളിച്ചുകൊണ്ടിരുന്നവരാണ് മാംസം ഇളകി വീണ നിലയിൽ അസ്ഥികൂടം കണ്ടെത്തിയത്.
തുടർന്നു വിവരം പോലീസിൽ അറിയിക്കുകയായിരുന്നു. ചിങ്ങവനം എസ്എച്ച്ഒ ബിൻസ് ജോസഫിന്റെ നേതൃത്വത്തിലുള്ള പോലീസ് സംഘം സ്ഥലത്തെത്തി അന്വേഷണം ആരംഭിച്ചിട്ടുണ്ട്.
പുളിമരത്തിൽ തുങ്ങിമരിച്ചയാളുടേതാണ് അസ്ഥികൂടമെന്ന് സംശയിക്കുന്നതായി പോലീസ് പറഞ്ഞു. സംഭവമറിഞ്ഞ് പ്രദേശത്ത് നാട്ടുകാരും തടിച്ചു കൂടിയിട്ടുണ്ട്.
