കോട്ടയം: സ്വകാര്യ ബസിൽ നഷ്ടപ്പെട്ട ബാഗിലുണ്ടായിരുന്ന എടിഎം കാർഡ് ഉപയോഗിച്ചു പണം പിൻവലിക്കുന്ന സ്ത്രീയുടെ ദൃശ്യങ്ങൾ ലഭിച്ചിട്ടും പ്രതിയെ പിടികൂടാൻ പോലീസിനു കഴിഞ്ഞിട്ടില്ല. കഴിഞ്ഞ 18നാണ് തോട്ടയ്ക്കാട് ചിറയ്ക്കൽ ശ്രീവിദ്യ അനിലിന്‍റെ ബാഗിൽ നിന്നും പഴ്സ് കോട്ടയം- കോഴഞ്ചേരി റൂട്ടിലോടുന്ന സ്വകാര്യ ബസിൽ വച്ചു നഷ്്ടപ്പെട്ടത്.
ഇതിലുണ്ടായിരുന്ന എടിഎം കാർഡ് ഉപയോഗിച്ച് ഇന്ത്യൻ ബാങ്കിന്‍റെ ബേക്കർ ജംഗ്ഷനിലുള്ള എടിഎമ്മിൽ നിന്നുമാണ് ആറു തവണയായി 34,000രൂപ പിൻവലിച്ചത്. ഇതോടെയാണു ശ്രീവിദ്യ ബാങ്കിൽ വിളിച്ചു കാർഡ് ബ്ലോക്ക് ചെയ്തത്. തുടർന്നു കോട്ടയം വെസ്റ്റ് പോലീസിൽ പരാതിയും നല്കി.
പരാതിക്കാർ തന്നെ ബാങ്ക് അധികൃതരുമായി ബന്ധപ്പെട്ടു എടിഎമ്മിലെ ദൃശ്യങ്ങൾ പരിശോധിച്ചതിൽ നിന്നും ഒരു സ്ത്രീയാണു പലതവണയായി പണം പിൻവലിച്ചിരിക്കുന്നതെന്നു കണ്ടെത്തി. ഈ ദൃശ്യങ്ങൾ ലഭിച്ചു 15 ദിവസങ്ങൾ കഴിഞ്ഞിട്ടും പോലീസിനു പണം പിൻവലിച്ച സ്ത്രീയെ കണ്ടെത്താൻ കഴിഞ്ഞിട്ടില്ല. ഈ ദൃശ്യങ്ങൾ അടക്കം പണം പിൻവലിച്ചയാളെ കണ്ടെത്താൻ സഹായിക്കണമെന്ന കുറിപ്പ് സാമൂഹിക മാധ്യമങ്ങളിൽ പ്രചരിക്കുകയാണ്.
