കാളികാവ്: സ്കൂൾ വിട്ടുവീട്ടിലേക്കു പോകുകയായിരുന്ന വിദ്യാർഥിനിയെ യുവാവ് മർദിച്ചു. അടക്കാക്കുണ്ട് ക്രസന്‍റ് ഹയർ സെക്കന്‍ററി സ്കൂളിന് സമീപത്ത് വച്ചാണ് സംഭവം. ഹയർ സെക്കൻഡറിയിൽ പഠിക്കുന്ന പെണ്‍കുട്ടിയുടെ മുഖത്ത് യുവാവ് കൈകൊണ്ട് ഇടിച്ച് പരിക്കേൽപ്പിക്കുകയാണ് ചെയ്തത്.
സ്കൂളിന് സമീപത്തെ വാഴപ്പുറവൻ ഹരീഷ് (28) എന്ന യുവാവിനെ പോലീസ് അറസ്റ്റ് ചെയ്തു. കഞ്ചാവ് ലഹരിക്കടിമയായ യുവാവിനെ മുന്പ് പിരിവെടുത്ത് ചികിത്സിച്ചിരുന്നതായി നാട്ടുകാർ പറഞ്ഞു. വീണ്ടും ലഹരിക്കടിമയായ യുവാവ് പെണ്‍കുട്ടിയെ മർദിക്കുകയാണുണ്ടായത്.
കുട്ടിയെ അപായപ്പെടുത്തുന്ന വിധത്തിൽ അക്രമിച്ച് പരിക്കേൽപ്പിച്ചതിനാണ് പോലീസ് കേസെടുത്തത്. കാളികാവ് എസ്ഐ സി.കെ.നൗഷാദിന്‍റെ നേതൃത്വത്തിലുള്ള പോലീസ് സംഘമാണ് പ്രതിയെ പിടികൂടിയത്. പ്രതിയെ ഇന്ന് മഞ്ചേരി ഫസ്റ്റ് ക്ലാസ് മജിസ്ട്രേറ്റ് കോടതിയിൽ ഹാജരാക്കും.
