നാദാപുരം: ഓട്ടോയില്‍ യാത്ര ചെയ്യുകയായിരുന്ന വിദ്യാര്‍ഥിനിയെ മാനഭംഗപ്പെടുത്താന്‍ ശ്രമിച്ചഡ്രൈവര്‍ പിടിയില്‍. പാറക്കടവിലെ കോമ്പി പൊന്നങ്കോട്ട് സമീറിനെ (28)യാണ് പോലീസ് അറസ്റ്റ് ചെയ്തത്. ഉമ്മത്തൂരിലേക്ക് പോവാനായി ഓട്ടോയില്‍ കയറിയതായിരുന്നു വിദ്യാര്‍ഥിനി. പാറക്കടവ് പാലത്തിന് സമീപം എത്തിയതോടെ ഓട്ടോ കേടായെന്ന് പറഞ്ഞ് പുറത്തേക്കിറങ്ങിയ സമീര്‍ വിദ്യാര്‍ഥിനിയെ കടന്നുപിടിക്കുകയായിരുന്നു.
ശനിയാഴ്ച്ച വൈകുന്നേരം നാലരയോടെയാണ് സംഭവം. സംഭവം ചോദ്യം ചെയ്ത മറ്റൊരു ഓട്ടോ ഡ്രൈവറെയും സമീര്‍ മര്‍ദിച്ചു. തുടര്‍ന്ന് സ്ഥലത്തെത്തിയ നാദാപുരം കണ്‍ട്രോള്‍ റൂം പോലീസ് സമീറിനെ പിടികൂടി. ഇതിനിടെ ഇയാള്‍ പോലീസുകാരെ അക്രമിക്കാന്‍ ശ്രമിച്ചു. ബലം പ്രയോഗിച്ച് യുവാവിനെ കീഴ്‌പ്പെടുത്തി നാദാപുരം പോലീസ് സ്‌റ്റേഷനിലെത്തിച്ചു. സംഭവമറിഞ്ഞ് വന്‍ ജനാവലിയാണ് സ്‌റ്റേഷനില്‍ തടിച്ച് കൂടിയത്. പോലീസ് സ്‌റ്റേഷനില്‍ യുവാവ് വനിതാ പോലീസുകാരെ അസഭ്യം പറയുകയും പോലീസുകാരെ കൈയ്യേറ്റം ചെയ്യാന്‍ ശ്രമിക്കുകയും ചെയ്തു. നാദാപുരം ഗവ.താലൂക്ക് ആശുപത്രിയില്‍ ചികിത്സ തേടിയ വിദ്യാര്‍ഥിനിയുടെ പരാതിയില്‍ പോലീസ് കേസെടുത്തു. ഐപിസി 354, 323 വകുപ്പുകള്‍ പ്രകാരമാണ് കേസെടുത്തത്.
