കല്ലൂര്‍(തൃശൂർ): ഉറങ്ങിക്കിടന്നിരുന്ന ഭാര്യയെ വെട്ടിപ്പരിക്കേല്‍പ്പിച്ചശേഷം ഭര്‍ത്താവ് ജീവനൊടുക്കി. കല്ലൂര്‍ പാടംവഴിയില്‍ കൂന്തിലി ബാബു (64) ആണ് വീടിനകത്ത് തൂങ്ങി മരിച്ചത്.
ഗുരുതരമായി പരിക്കേറ്റ ഭാര്യ ഗ്രേസിയെ (58) തൃശൂരിലെ സ്വകാര്യ ആശുപത്രിയില്‍ പ്രവേശിപ്പിച്ചു.ഇന്നു പുലര്‍ച്ചെ രണ്ടരയോടെയാണ് സംഭവം. കുടുംബവഴക്കാണ് അക്രമത്തിന് കാരണമെന്ന് പറയുന്നു.
ഉറങ്ങിക്കിടക്കുകയായിരുന്ന ഗ്രേസിയെ വെട്ടുകത്തി ഉപയോഗിച്ച് വെട്ടുകയായിരുന്നു. കഴുത്തിലും ശരീരമാസകലവും വെട്ടേറ്റ ഗ്രേസി വീടിന്‍റെ വാതില്‍ തുറന്ന് അയല്‍വാസിയുടെ വീട്ടിലേക്ക് ഓടിക്കയറുകയായിരുന്നു.
സമീപവാസികള്‍ ചേര്‍ന്ന് ആംബുലന്‍സ് വിളിച്ചാണ് ഗ്രേസിയെ തൃശൂരിലെ സ്വകാര്യ ആശുപത്രിയില്‍ എത്തിച്ചത്. ഗ്രേസി പുറത്തേക്ക് ഇറങ്ങി ഓടിയ സമയത്താണ് ബാബു വീടിനകത്ത് ആത്മഹത്യ ചെയ്തത്.
പുതുക്കാട് പോലീസ് സ്ഥലത്തെത്തി മേല്‍നടപടികള്‍ സ്വീകരിച്ചു.ഫോറന്‍സിക്, വിരലടയാള വിദഗ്ധര്‍ സ്ഥലത്തെത്തിയ ശേഷം ഇന്‍ക്വസ്റ്റ് നടപടികള്‍ പൂര്‍ത്തിയാക്കുമെന്ന് പുതുക്കാട് എസ്എച്ച്ഒ യു.എച്ച്.സുനില്‍ദാസ് അറിയിച്ചു.
