ആറാം നിലയിൽനിന്നു താഴേക്കു വീണ മൂന്നു വയസുകാരനെ നാട്ടുകാർ രക്ഷിക്കാൻ ശ്രമിക്കുന്ന വീഡിയോ വൈറലാകുന്നു. തെക്കു പടിഞ്ഞാറൻ ചൈനയിലെ ചോംഗിംഗിലെ അപ്പാർട്ട്മെന്‍റിലാണ് സംഭവം.
അപകടം നടക്കുന്ന സമയത്ത് ആറാം നിലയിലെ അപ്പാർട്ടുമെന്‍റിൽ കുട്ടി ഒറ്റയ്ക്കായിരുന്നുവെന്നാണ് പോലീസ് നൽകുന്ന റിപ്പോർട്ട്. കുട്ടി ബാൽക്കണിയിൽ തൂങ്ങി നിൽക്കുന്നത് ശ്രദ്ധയിൽപ്പെട്ടവർ ഉടൻ തന്നെ രക്ഷാപ്രവർത്തനവുമായി രംഗത്തെത്തി.
ബാൽക്കണിയിൽ തൂങ്ങി നിൽക്കുകയായിരുന്ന കുട്ടി അൽപ്പനേരത്തിനു ശേഷം താഴേക്കു വീഴുകയായിരുന്നു. ഈ സമയം വലിയ പുതപ്പുകൾ ചേർത്തു പിടിച്ച് ആളുകൾ കുട്ടിയെ രക്ഷപ്പെടുത്തുകയായിരുന്നു. ഇതിന്‍റെ വീഡിയോ ഇപ്പോൾ വൈറലായിരിക്കുകയാണ്.
