പത്തനംതിട്ട: പത്തനംതിട്ട ജില്ലാ ആശുപത്രിയിൽനിന്നു യുവതി കടത്തികൊണ്ടുപോയ നാലു ദിവസം പ്രായമായ നവജാത ശിശുവിനെ കണ്ടെത്തി. കുഞ്ഞിനെ പോലീസ് ആശുപത്രിയിൽ പ്രവേശിപ്പിച്ചു. കുഞ്ഞിനെ തട്ടിക്കൊണ്ടുപോയ സ്ത്രീയെ പോലീസ് പിടികൂടി. കുഞ്ഞിനെയുമായി പോയ യുവതി ആനപ്പാറ കുലശേഖരംപടി-കുന്പഴ മേഖലയിൽ എത്തിയതായി സൂചന ലഭിച്ചതിനെ തുടർന്ന് ഇവിടെ പരിശോധന കർശനമാക്കിയിരുന്നു.
രാവിലെ 11.10ന് പത്തനാപുരം പനയ്ക്കപതാലിൽ പാസ്റ്റർ സജി ചാക്കോയുടെയും ചെല്ലക്കാട് മാടത്തുംപടി കാവുംമൂലയിൽ അനിതയുടെയും കുഞ്ഞിനെയാണ് യുവതി കൈക്കലാക്കിയത്. നാലു ദിവസം പ്രായമായ ആണ്‍കുഞ്ഞിനെ പിതാവിന്‍റെ കൈയിൽനിന്നു തന്ത്രപൂർവം കൈക്കലാക്കി യുവതി കടന്നുകളയുകയായിരുന്നു.
പ്രസവവാർഡിനു പുറത്തു പിതാവിന്‍റെ കൈയിലിരുന്ന കുഞ്ഞിനെ പാൽ കൊടുക്കാൻ സമയമായി, അമ്മയെ ഏല്പിക്കാം എന്നു പറഞ്ഞാണ് യുവതി വാങ്ങിയത്. പ്രസവവാർഡിൽ നിന്നാണ് ഇവർ വന്നതെന്നും മലയാളത്തിലാണു സംസാരിച്ചതെന്നും സജി പറയുന്നു. രണ്ടു ദിവസമായി ഇവർ ഈ വാർഡിൽ ഉണ്ടായിരുന്നു. പ്രസവവാർഡിന്‍റെ പിൻവശത്തുകൂടി ആശുപത്രിയുടെ പ്രധാന കവാടത്തിലെത്തി ഓട്ടോറിക്ഷയിലാണ് ഇവർ കടന്നുകളഞ്ഞത്. ഇവരുടെ സിസിടിവി ദൃശ്യങ്ങൾ പോലീസിനു ലഭിച്ചിരുന്നു.
