മലയാളത്തിലെ എക്കാലത്തെയും ജനപ്രിയ സിനിമകളുടെ കൂട്ടത്തില്‍ പെടുന്ന ചിത്രമാണ് ലാല്‍ജോസ് സംവിധാനം ചെയ്ത് 2006-ല്‍ പുറത്തെത്തിയ ക്ലാസ്‌മേറ്റ്‌സ്.
ഈ ചിത്രത്തിന്‍റെ ഷൂട്ടിംഗിനിടെ നടന്ന വ്യക്തിപരമായി പ്രാധാന്യമുള്ള ഒരു ഓര്‍മ അടുത്ത കാലത്ത് ബാലചന്ദ്രമേനോൻ പങ്കുവച്ചിരുന്നു. പ്രഫ. അയ്യര്‍ എന്ന കോളജ് അധ്യാപകന്‍റെ വേഷമായിരുന്നു ചിത്രത്തില്‍ ബാലചന്ദ്ര മേനോൻ ചെയ്തത്.
താന്‍ വിവാഹ വാര്‍ഷികം ആഘോഷിച്ച ഒരേയൊരു സിനിമാ സെറ്റ് ക്ലാസ്‌മേറ്റ്‌സിന്‍റേത് ആയിരുന്നുവെന്ന് ബാലചന്ദ്ര മേനോന്‍ പറയുന്നു. ക്ലാസ്‌മേറ്റ്‌സ്! ഞാന്‍ ഏറെ ആസ്വദിച്ച ചിത്രം.
പക്ഷേ എന്നെ സംബന്ധിച്ച് ആ സിനിമയെ കൂടുതല്‍ സ്‌പെഷല്‍ ആക്കുന്നത്, എന്‍റെ വിവാഹ വാര്‍ഷികം ആഘോഷിക്കാന്‍ കഴിഞ്ഞ ഒരേയൊരു സിനിമാ സെറ്റ് അതാണ് എന്നതാണ്.
ഭാര്യയും മകളും എനിക്കൊപ്പമുണ്ടായിരുന്നു. ജഗതി ശ്രീകുമാറും ശോഭയും ആഘോഷത്തില്‍ പങ്കെടുത്തു. 15 വര്‍ഷങ്ങള്‍ക്കിപ്പുറം ആ ചെറുപ്പക്കാര്‍ ഒക്കെത്തന്നെ നല്ല ഭര്‍ത്താക്കന്മാരായും ഭാര്യമാരായും ഒപ്പം സിനിമയിലും വിജയം കൈവരിച്ചവരായും നില്‍ക്കുന്നതു കാണുമ്പോള്‍ ഏറെ സന്തോഷമുണ്ട്- ക്ലാസ്‌മേറ്റ്‌സ് ഓര്‍മ്മച്ചിത്രങ്ങള്‍ക്കൊപ്പം ബാലചന്ദ്ര മേനോന്‍ ഇന്‍സ്റ്റഗ്രാമില്‍ കുറിച്ചു.
പൃഥ്വിരാജ്, നരേൻ, ജയസൂര്യ, ഇന്ദ്രജിത്ത്, കാവ്യ മാധവന്‍, ബാലചന്ദ്ര മേനോന്‍, ജഗതി ശ്രീകുമാര്‍, സുരാജ് വെഞ്ഞാറമൂട്, സുകുമാരി തുടങ്ങി വലിയ താരനിര അണിനിരന്ന ചിത്രമായിരുന്നു ക്ലാസ്‌മേറ്റ്‌സ്. -പിജി
