ബാഴ്സലോണ: സ്പാനിഷ് ലാ ലിഗ ഫുട്ബോളിൽ തുടർച്ചയായ അഞ്ചാം ജയത്തോടെ ബാഴ്സലോണ പോയിന്റ് പട്ടികയിൽ രണ്ടാം സ്ഥാനത്തു തിരിച്ചെത്തി. ഹോം മത്സരത്തിൽ വയ്യഡോലിഡിനെ 1-0ന് ബാഴ്സ പരാജയപ്പെടുത്തി. 90-ാം മിനിറ്റിൽ ഒസമൻ ഡെംബലെയായിരുന്നു ബാഴ്സയുടെ ജയം കുറിച്ച ഗോൾ സ്വന്തമാക്കിയത്.
ലീഗിൽ ഒന്നാം സ്ഥാനത്തുള്ള അത്ലറ്റിക്കോ മാഡ്രിഡുമായുള്ള പോയിന്റ് വ്യത്യാസം ബാഴ്സ ഇതോടെ ഒന്നാക്കി കുറച്ചു. 29 മത്സരം പൂർത്തിയായപ്പോൾ അത്ലറ്റിക്കോയ്ക്ക് 66 പോയിന്റാണുള്ളത്. ബാഴ്സ 65 പോയിന്റുമായി രണ്ടാമതും റയൽ മാഡ്രിഡ് 63 പോയിന്റുമായി മൂന്നാമതുമുണ്ട്.
ലീഗിൽ നിലവിൽ ഏറ്റവും ഫോമിലുള്ള ടീമാണു ബാഴ്സ. തുടർച്ചയായ 17-ാം മത്സരത്തിലാണു ബാഴ്സ തോൽവിയില്ലാതെ കളം വിടുന്നത്. ഡിസംബർ അഞ്ചിനു കാഡിഫിനോടു പരാജയപ്പെട്ടശേഷം ബാഴ്സ തോൽവി അറിഞ്ഞിട്ടില്ല.
