പെരുമ്പാവൂർ: പെരുമ്പാവൂര്‍ നഗരത്തില്‍ ഇതരസംസ്ഥാനത്തൊഴിലാളികളുടെ അതിക്രമങ്ങള്‍ പെരുകുന്ന സാഹചര്യത്തില്‍ ഇത്തരക്കാർക്കെതിരേ കർശന നടപടികൾ സ്വീകരിക്കുമെന്ന് എല്‍ദോസ് കുന്നപ്പിളളി എംഎൽഎ അറിയിച്ചു.
ഇതരസംസ്ഥാന തൊഴിലാളികൾ കൂടുതലും തിങ്ങിപ്പാര്‍ക്കുന്നത് പെരുമ്പാവൂര്‍ മേഖലയിലാണ്. ഇവർക്കെതിരേ കഞ്ചാവ്, മയക്കുമരുന്ന് ഉള്‍പ്പെടെയുള്ള നിരവധി കേസുകളിൽ പോലീസ്, എക്സൈസ് വകുപ്പുകൾ നടപടി സ്വീകരിച്ചിട്ടുണ്ട്. എന്നിട്ടും പെരുമ്പാവൂര്‍ മേഖല ലഹരി മാഫിയയുടെ കേന്ദ്രമായി മാറിയിരിക്കുകയാണ്. ഈ സാഹചര്യത്തിലാണ് ഡെപ്യൂട്ടി കളക്ടര്‍, തഹസിൽദാർ എന്നിവർ അടക്കമുള്ള ഉന്നത ഉദ്യോഗസ്ഥരുടെ സാന്നിധ്യത്തില്‍ എംഎൽഎ യോഗം വിളിച്ചത്.
ജനജാഗ്രത സമിതികൾ പ്രവർത്തിച്ചാലും ഇതര സംസ്ഥാനത്തൊഴിലാളികൾ മൂലമുള്ള കുറ്റകൃത്യങ്ങൾ തടയുന്നതിന് ബന്ധപ്പെട്ട വകുപ്പുകൾ ഉണർന്ന് പ്രവർത്തിക്കേണ്ടതുണ്ട്. ലഹരി വസ്തുക്കൾ പിടിക്കപ്പെട്ടാലും വളരെ കുറഞ്ഞ പിഴത്തുക അടച്ചു പ്രതികൾ കുറ്റവിമുക്തരാകും എന്നതാണ് പ്രധാന പ്രശ്നം. ഇത് വീണ്ടും കുറ്റകൃത്യങ്ങളിൽ ഏർപ്പെടുന്നതിന് കാരണമാകുമെന്നും യോഗം വിലയിരുത്തി. കഴിഞ്ഞ രണ്ട് മാസത്തിനുള്ളിൽ ഇരുന്നൂറിലധികം ലഹരി മരുന്ന് കേസുകൾ ഇവിടെ രജിസ്റ്റർ ചെയ്തിട്ടുണ്ട്.
പെരുമ്പാവൂര്‍ മേഖലയില്‍ ജോലിയെടുക്കുന്ന ഇതരസംസ്ഥാന തൊഴിലാളികള്‍ക്ക് ഇന്‍ഷ്വറന്‍സ് കാര്‍ഡ് പരിരക്ഷയും അവര്‍ ജനിച്ച നാട്ടിലെ പോലീസ് വേരിഫിക്കേഷന്‍ സര്‍ട്ടിഫിക്കറ്റും നിര്‍ബന്ധമാക്കും.
അല്ലാത്തപക്ഷം ഇവർക്ക് ജോലി നൽകുന്നവർക്കെതിരേ കര്‍ശന നടപടി സ്വീകരിക്കുമെന്നും എംഎല്‍എ യോഗത്തിൽ വ്യക്തമാക്കി. കുന്നത്തുനാട് താലൂക്കില്‍ മാത്രം ഇതുവരെ 50,000 പേര്‍ക്ക് ഇന്‍ഷ്വറന്‍സ് കാര്‍ഡ് നല്‍കിയിട്ടുണ്ട്.
അല്ലാത്തവര്‍ ജനുവരി 31നകം നിര്‍ബന്ധമായും അത് എടുക്കണം. പെരുന്പാവൂർ മേഖലയിൽ വേണ്ടത്ര പോലീസ്, എക്സൈസ് ഉദ്യോഗസ്ഥരില്ലെന്നത് പരിമിതിയാണെന്നും അത് മറികടക്കുന്നതിന് വേണ്ട നടപടികൾ സ്വീകരിക്കുമെന്നും എല്‍ദോസ് കുന്നപ്പിള്ളി എംഎല്‍എ അറിയിച്ചു.
ഡെപ്യൂട്ടി കളക്ടർ സന്ധ്യാ ദേവി, തഹസിൽദാർ വിനോദ് രാജ്, അഷ്റഫ് വാണിയാക്കടൻ, അജിൽ കുമാർ മനയത്ത്, എക്സൈസ് സിഐ സി.കെ. സജികുമാർ, പോലീസ് ഉദ്യോഗസ്ഥരായ എൻ.പി. ശശി , കെ.എൻ. ബോസ്, എൻ.വി. പോൾ, സിഇഒ സുമേഷ് കുമാർ, മുനിസിപ്പൽ സൂപ്രണ്ട് എൽ. ജോൺസൺ, തൊഴിൽ വകുപ്പ് ക്ലർക്ക് വി.കെ. രാജേഷ്, ഹെൽത്ത് ഇൻസ്‌പെക്ടർ ദിലീപ് കുമാർഎന്നിവർ ഇതോടനുബന്ധിച്ചു ചേർന്ന യോഗത്തിൽ പങ്കെടുത്തു.
