തൃശൂര്‍: സംസ്ഥാന സ്കൂള്‍ കലോത്സവത്തില്‍ ഹൈസ്കൂള്‍, ഹയര്‍ സെക്കന്‍ഡറി വിഭാഗം നാടക മത്സരത്തിലെ മികച്ച നടനും നടിക്കും പാര്‍ട്ട് -ഒഎന്‍ഒ ഫിലിംസും, ബിന്നി ഇമ്മട്ടി ക്രിയേഷന്‍സും സംയുക്തമായി ഭരത് പി.ജെ. ആന്‍റണിയുടെ പേരില്‍ നാടക അഭിനയ പ്രതിഭാ പുരസ്കാരം നല്കുമെന്നു ഭാരവാഹികള്‍ പത്രസമ്മേളനത്തില്‍ അറിയിച്ചു.
ആലപ്പുഴ പ്രസ്ക്ലബ്, പി.എം. ആന്‍റണി സ്മാരക ഫൗണ്ടേഷന്‍ എന്നിവരുടെ സഹകരണത്തോടെയാണ് പുരസ്കാരം നല്കുക. അവാര്‍ഡിന്‍റെ ഭാഗമായുള്ള ഭരത് പി.ജെ. ആന്‍റണി സ്മാരക പ്രശസ്തിപത്രം പ്രകാശനം ആലപ്പുഴ പ്രസ്ക്ലബ് പ്രസിഡന്‍റ് വി.എസ്. ഉമേഷ് നാളെ ആലപ്പുഴ പ്രസ്ക്ലബില്‍ നിര്‍വഹിക്കും.
പാര്‍ട്ട് – ഒഎന്‍ഒ ഫിലിംസ് തൃശൂര്‍ പ്രസിദ്ധീകരിച്ച 1,000 രൂപയുടെ നാടക സംബന്ധിയായ പുസ്തകങ്ങളും, ഡിവിഡികളും, ശില്പി മണികണ്ഠന്‍ കിഴക്കൂട്ട് രൂപകല്പന ചെയ്ത മെമന്റോയും, കേരള സാഹിത്യ അക്കാദമി പ്രസിദ്ധീകരിച്ച ഭരത് പി.ജെ. ആന്‍റണിയെക്കുറിച്ചുള്ള ജീവചരിത്ര ഗ്രന്ഥവും പ്രശസ്തിപത്രവും അടങ്ങുന്നതായിരിക്കും അവാര്‍ഡുകള്‍.
ചാക്കോ ഡി. അന്തിക്കാട്, ബിന്നി ഇമ്മട്ടി, കെ.ആര്‍. അജിത്ബാബു, ശ്രീജിത്ത് പുറനാട്ടുകര, പി.വി. ഫ്രാന്‍സീസ് എന്നിവര്‍ പത്രസമ്മേളനത്തില്‍ പങ്കെടുത്തു.
