വിഴിഞ്ഞം: ഉച്ചക്കടപയറ്റുവിളയിൽ ബിവറേജസ് ഔട്ട് ലെറ്റിന് കെട്ടിടം വാടകയ്ക്കു നൽകിയ കെട്ടിട ഉടമയ്ക്ക് വെട്ടേറ്റു. ഇടതും കൈക്ക് വെട്ടേറ്റ ഉടമസ്ഥനെ ആശുപത്രിയിൽ പ്രവേശിപ്പിച്ചു. പയറ്റുവിള ആര്യ ഭവനിൽ ചന്ദ്രകുമാർ(55)നെയാണ് വെട്ടി പരിക്കേൽപ്പിച്ചത്. സംഭവവുമായി ബന്ധപ്പെട്ട് ഉച്ചക്കട പുലിവിള വീട്ടിൽ സന്തോഷ് (29)നെ വിഴിഞ്ഞം പോലീസ് അറസ്റ്റുചെയ്തു. ഇയാൾക്കെതിരെ കൊലപാതക ശ്രമത്തിന് കേസെടുത്തതായി പോലീസ് അറിയിച്ചു.
ഇന്നലെ ഉച്ചയ്ക്ക് 12 ഓടെ പയറ്റുവിള ജംഗ്ഷനിലാണ് സംഭവം. ചന്ദ്രൻ നടത്തുന്ന ബേക്കറി കടക്കുള്ളിൽ വെട്ടുകത്തിയുമായെത്തിയാണ് ആക്രമണം. ബേക്കറിക്കുള്ളിൽനിന്ന് നിലവിളികേട്ട് ഔട്ട് ലെറ്റിനു സമീപത്ത് ഡ്യൂട്ടിയിലുണ്ടായിരുന്ന പോലീസും നാട്ടുകാരും ചേർന്നാണ് പ്രതി യെ കീഴ്പ്പെടുത്തിയത്.
ബിവറേജസ് ഔട്ട് ലെറ്റിനു കെട്ടിടം വാടകയ്ക്ക് നൽകിയതിലുള്ള വിരോധമാകാം ആക്രമത്തിന് കാരണമെന്നാണ് പോലീസ് നിഗമനം. പയറ്റുവിളയിൽ ബിവറേജസ് കോർപറേഷന്‍റെ ഔട്ട് ലെറ്റ് വരുന്നതിനിതിരെ ജനകീയ സമിതിയുടെ നേതൃത്വത്തിൽ സമരം നടന്നുവരികയാണ്.
