അനുഷ്‌കഷെട്ടി കേന്ദ്രകഥാപാത്രത്തെ അവതരിപ്പിക്കുന്ന പുതിയ ഹൊറര്‍ ത്രില്ലര്‍ ചിത്രമാണ് ഭാഗമതി. ചിത്രത്തിന്റെ ട്രെയിലര്‍ വന്‍ഹിറ്റായിരുന്നു. സൂര്യയും രമ്യ കൃഷ്ണനുമടക്കമുള്ള വന്‍ നിര താരങ്ങളാണ് ഓഡിയോ ലോഞ്ചില്‍ അതിഥികളായി എത്തിയത്. സിങ്കമെന്ന സൂപ്പര്‍ ഹിറ്റ് ചിത്രത്തില്‍ നായികയും നായകനും ആയവരാണ് സൂര്യയും അനുഷ്‌കയും. ബ്രഹ്മാണ്ഡ ചിത്രം ബാഹുബലിയില്‍ മത്സരിച്ച് അഭിനയിച്ചവരാണ് രമ്യയും അനുഷ്‌കയും. എന്നാല്‍ അവിടെയെത്തിവരേക്കാള്‍ പ്രേക്ഷകര്‍ ചര്‍ച്ച ചെയ്തത് ബാഹുബലിയില്‍ അനുഷ്‌കയുടെ നായകനായ പ്രഭാസിന്റെ അസാന്നിദ്ധ്യമായിരുന്നു.
സോഷ്യല്‍മീഡിയയില്‍ ഉയര്‍ന്നു കേട്ട ചോദ്യവും ഇതാണ്.ഏതു പരിപാടിക്ക് ഒന്നിച്ചെത്തിയാലും പരസ്പരം സ്‌നേഹപൂര്‍വ്വം ആലിംഗനം ചെയ്ത് സംസാരിച്ചിരിക്കുന്ന അനുഷ്‌കയേയും പ്രഭാസിനേയും പ്രേക്ഷകര്‍ക്ക് ഒരുപാടിഷ്ടമാണ്. ഇരുവരും ജീവിതത്തിലും ഒന്നിക്കണമെന്ന ആഗ്രഹവും അവര്‍ക്കിടയില്‍ തീവ്രമാണ്. അതുകൊണ്ടാണ് ഇത്തരം ചോദ്യങ്ങളുയരുന്നത്. പ്രഭാസിന്റെ അസാന്നിധ്യത്തിനു കൃത്യമായ കാരണം എന്താണെന്നു വ്യക്തമല്ല. പല കാരണങ്ങളാണ് കമന്റില്‍ നിറയുന്നത്. എങ്കിലും തന്റെ പുതിയ ചിത്രം സഹോയുടെ തിരക്കിലാണ് പ്രഭാസ് എന്നാണ് പ്രേക്ഷകരുടെ ഏകദേശ നിഗമനം.
തെലുങ്കിലും തമിഴിലുമായെത്തുന്ന ഭാഗമതിയുടെ തമിഴ് പതിപ്പിന്റെ ഓഡിയോ ലോഞ്ച് ചെന്നൈയിലാണു നടന്നത്. അന്നും പ്രഭാസ് എത്തിയിരുന്നില്ല. തെലുങ്ക് പതിപ്പിന്റേത് ഹൈദരാബാദിലും. ഇവിടേയ്‌ക്കെങ്കിലും പ്രഭാസ് എത്തുമെന്നു കരുതിയെങ്കിലും നിരാശയായിരുന്നു ഫലം. സംഗീത സംവിധാനം നിര്‍വ്വഹിച്ച എസ്.തമന്‍ പ്രസംഗത്തിനിടെ പ്രഭാസിന്റെ പേര് എടുത്തു പറയുകയും ചെയ്തു. ബാഹുബലി പ്രഭാസിനു വേണ്ടിയുള്ളതായിരുന്നുവെങ്കില്‍ ഭാഗമതി അനുഷ്‌കയുടേതാണെന്ന്. ചിത്രത്തിന്റെ അണിയറ പ്രവര്‍ത്തകരെല്ലാം വന്‍ പ്രതീക്ഷയിലുമാണ്. ഇരുവരുടെയും പുത്തന്‍ ചിത്രങ്ങള്‍ യുവി ക്രിയേഷന്‍സ് ആണു നിര്‍മിക്കുന്നത് എന്നതാണ് മറ്റൊരു കൗതുകം. എന്തായാലും ഇരുചിത്രങ്ങളും വന്‍പ്രതീക്ഷയാണ് വച്ചു പുലര്‍ത്തുന്നത്.
