ഒടുവില്‍ ഭാമ തന്നെ അത് തുറന്നു സമ്മതിച്ചിരിക്കുന്നു. പറഞ്ഞുവരുന്നത് കന്നഡ ചിത്രമായ ഓട്ടോ രാജയില്‍ ഗ്ലാമര്‍ വേഷത്തിലെത്തിയതിനെക്കുറിച്ചാണ്. നാടന്‍ പെണ്‍കുട്ടി ഇമേജില്‍ നിന്ന് കന്നടയിലേക്ക് പോയ ഭാമ ഓട്ടോ രാജ എന്ന ചിത്രത്തില്‍ ഒരു ഐറ്റം ഡാന്‍സ് ചെയ്തതോടെ മലയാളികള്‍ ഞെട്ടി. ആ സിനിമയും പാട്ടും ചെയ്യാനുണ്ടായ കാരണത്തെ കുറിച്ച് ഭാമ പറയുന്നു. ഒരു ഗ്രാമത്തില്‍ ജനിച്ചു വളര്‍ന്ന പെണ്‍കുട്ടിയുടെ ചെറുപ്പം മുതലേയുള്ള ആഗ്രഹമാണ് ഒരു നായികയാകണം എന്ന്. അവള്‍ ആ സ്വപ്‌നത്തില്‍ എത്തിച്ചേരുന്നു. സിനിമയുടെ തുടക്കത്തിലൊക്കെ ധാവണിയും മൂക്കുത്തിയും മുല്ലപ്പൂവുമൊക്കെ അണിഞ്ഞെത്തുന്ന നായികയാണ്. സിനിമാ നടി ആയ ശേഷമുള്ള മാറ്റം കാണിക്കുമ്പോള്‍ മറ്റൊരു ഗെറ്റപ്പ് സ്വീകരിക്കേണ്ടി വരുന്നു.
ചിത്രത്തിന്റെ സംവിധായകന്‍ കൊച്ചിയില്‍ വന്നിട്ടാണ് എന്നോട് സിനിമയുടെ കഥ പറയുന്നത്. കഥ കേട്ടപ്പോള്‍ എനിക്ക് വളരെ അധികം ഇഷ്ടമായി. അവസാനമാണ് ഇങ്ങനെയൊരു പാട്ട് ഉണ്ട് എന്ന് പറഞ്ഞത്. നിര്‍ബന്ധിക്കില്ല എന്നും, എന്നാല്‍ കഥാപാത്രത്തിന്റെയും സിനിമയുടെയും വിജയത്തിന് ഇത് അത്യാവശ്യമാണെന്നും അദ്ദേഹം പറഞ്ഞു.
