കോഴിക്കോട്: അരക്കോടി രൂപയുടെ ബ്രൗണ്‍ഷുഗറുമായി മയക്കുമരുന്നു മാഫിയയിലെ പ്രധാനി കണ്ണിയെ പോലീസ് പിടികൂടി. രാജസ്ഥാനിലെ പ്രതാപ് ഘട്ട് സ്വദേശി ഭരത് ലാല്‍ ആജ്‌ന(36)യെയാണ് 500 ഗ്രാം ബ്രൗണ്‍ ഷുഗറുമായി കുന്ദമംഗലം എസ്‌ഐ കൈലാസ് നാഥിന്‍റെ നേതൃത്വത്തില്‍ കുന്ദമംഗലം പോലീസും കോഴിക്കോട് സിറ്റി ഡിസ്ട്രിക്റ്റ് ആന്‍റി നാര്‍കോട്ടിക് സ്‌പെഷല്‍ ആക്ഷന്‍ ഫോഴ്‌സും (ഡന്‍സാഫ്) ചേര്‍ന്ന് പിടികൂടിയത്.
കേരളം, കര്‍ണാടക സംസ്ഥാനങ്ങളിലെ മയക്കുമരുന്ന് കച്ചവടക്കാര്‍ക്ക് ബ്രൗണ്‍ ഷുഗര്‍ വിതരണം ചെയ്യുന്ന മയക്കുമരുന്നു മാഫിയയിലെ പ്രധാനി കണ്ണിയാണ് ഭരത് ലാല്‍ ആജ്‌ന . കട്ടാങ്ങല്‍ എന്‍ഐടി പരിസരത്ത് നിന്നാണ് പ്രതിയെ പിടികൂടിയത്. ബ്രൗണ്‍ ഷുഗറിന്‍റെ ഓവര്‍ഡോസ് മൂലം കഴിഞ്ഞ ഏതാനും മാസങ്ങള്‍ക്കിടയില്‍ കോഴിക്കോട് ജില്ലയില്‍ നാലുപേര്‍ മരിച്ചിരുന്നു.
തുടര്‍ന്ന് കോഴിക്കോട് സിറ്റി നോര്‍ത്ത് അസി. കമ്മീഷണര്‍ പ്രൃഥ്വിരാജന്‍റെ നേതൃത്വത്തിലുള്ള ജില്ലാ ആന്‍റി നാര്‍ക്കോട്ടിക് സ്‌പെഷല്‍ ആക്ഷന്‍ ഫോഴ്‌സ് മരിച്ചവരുടെ ഫോണ്‍ കോളുകള്‍ കേന്ദ്രീകരിച്ചും ജില്ലയിലെ പ്രധാന ബ്രൗണ്‍ഷുഗര്‍ ഉപയോക്താക്കളെയും ചില്ലറ വില്‍പനക്കാരെ കേന്ദ്രീകരിച്ചും നടത്തിയ അന്വേഷണത്തിലാണ് ഭരത് ലാല്‍ ആജ്‌നയെ കുറിച്ച് അറിയുന്നത്. ഇയാളാണ് പ്രധാനമായും കേരളത്തിന്‍റെ വടക്കന്‍ ജില്ലകളിലെ മയക്കുമരുന്ന് മാഫിയക്ക് ബ്രൗണ്‍ഷുഗര്‍ വലിയ അളവില്‍ എത്തിച്ചു നല്‍കുന്നത്.
കോഴിക്കോടിന് പുറമെ മംഗലാപുരം, കാസര്‍ഗോഡ് ഭാഗങ്ങളിലും ഇയാളാണ് ബ്രൗണ്‍ ഷുഗര്‍ എത്തിച്ച് നല്‍കുന്നതെന്നും മാസത്തില്‍ ഒരു തവണയാണ് ഇയാള്‍ ബ്രൗണ്‍ഷുഗറുമായി കേരളത്തിലെത്തുന്നതെന്നും മനസിലാക്കിയ പോലീസ് കഴിഞ്ഞ മാസം ഇയാളെ പിടികൂടാനായി എത്തിയെങ്കിലും സാധിച്ചില്ല. കഴിഞ്ഞ ദിവസം കോഴിക്കോട്ടേക്കുള്ള ബ്രൗണ്‍ ഷുഗറുമായി ഇയാള്‍ രാജസ്ഥാനില്‍ നിന്നും പുറപ്പെട്ടതായി വിവരം ലഭിച്ച പോലീസ് കാസര്‍ഗോഡ് ജില്ല മുതല്‍ ഇയാളുടെ നീക്കങ്ങള്‍ നിരീക്ഷിച്ചു വരികയായിരുന്നു.
ഓരോ തവണ കേരളത്തിലെത്തുമ്പോഴും വ്യത്യസ്തമായ സ്ഥലങ്ങളില്‍ വച്ചാണ് ഇയാള്‍ ബ്രൗണ്‍ ഷുഗര്‍ ഇടനിലക്കാര്‍ക്ക് കൈമാറിയത്. ജില്ലയില്‍ പോലീസ് നടത്തിയ കൃത്യമായ ആസൂത്രണത്തില്‍ ബ്രൗണ്‍ ഷുഗറുമായി ഏത് സ്റ്റേഷന്‍ പരിധിയില്‍ എത്തിയാലും ഇയാളെ പിടികൂടാനായി പോലീസ് തയാറെടുത്തിരുന്നു.
വ്യാഴാഴ്ച പകല്‍ ബ്രൗണ്‍ ഷുഗറുമായി കുന്ദമംഗലം പോലീസ് സ്റ്റേഷന്‍ പരിധിയിലെ എന്‍ഐടി പരിസരത്ത് ഇയാള്‍ എത്തിയതായി പോലീസിന് ലഭിച്ച രഹസ്യവിവരത്തിന്റെ അടിസ്ഥാനത്തില്‍ കുന്ദമംഗലം പോലീസും സിറ്റി ആന്‍റി നാര്‍ക്കോട്ടിക് സ്‌പെഷല്‍ ആക്ഷന്‍ ഫോഴ്‌സും ചേര്‍ന്ന് നടത്തിയ ആസൂത്രിത നീക്കത്തിലാണ് വില്പനക്കായി കൊണ്ടുവന്ന അരക്കിലോ ബ്രൗണ്‍ഷുഗറുമായി ഇയാളെ അറസ്റ്റ് ചെയ്യുന്നത്.
കുന്ദമംഗലം പോലീസ് സ്റ്റേഷനിലെ എഎസ്‌ഐ ബാബു പുതുശ്ശേരി, ഹോം ഗാര്‍ഡ് മോഹനന്‍ ഡന്‍സാഫ് അംഗങ്ങളായ എം. മുഹമ്മദ് ഷാഫി , എം. സജി, പി. അഖിലേഷ്, കെ.എ. ജോമോന്‍ , എന്‍ . നവീന്‍ , രജിത്ത് ചന്ദ്രന്‍ , എം. ജിനേഷ് , എ.വി. സുമേഷ് , പി. സോജി എന്നിവരുള്‍പ്പെട്ട സംഘമാണ് പ്രതിയെ പിടികൂടിയത്.
